BOKS

Ekipi i Tiranës në boks ka marrë revanshin në Kupën e Shqipërisë duke i marrë Vllaznisë vendin e parë në këtë aktivitet. Në finalet e ditës së sotme, skuadra kryeqytetase ka arritur të grumbullojë 17 pikë duke zënë vendin e parë, në të dytin është renditur ekipi privat Enea me 16 dhe ne vendin e tretë Vllaznia me 15 pikë. Ndoshta nuk ishim mësuar ta shihnim Vllazninë në këto pozita megjithatë kjo është renditja përfundimtare e kupës së sivjetme. Në finalet e ditës së sotme Ronildo Pirani në peshën 60 kg, është mundur nga kosovari Liridon Zeqiri.

Sukseset për boksierët shkodranë nuk kanë fund për vitin 2011. Pasi janë shpallur më të mirët në vend, pasi kanë përfaqësuar denjësisht Shqipërinë në Kampionatin Botëror, pasi i kanë dhuruar dy medalje të arta Shkodrës në turneun e rëndësishëm "Gongu i Artë" i Maqedonisë, vijnë edhe dy suksese të tjera. Janë sërish dy boksierët, Asmer Bilali dhe Kristian Demaj që kanë triumfuar edhe në kupën "Adem Jashari" që u zhvillua për dy ditë me rradhë në Prishtinë dhe Ferizaj të Kosovës.

Për Memorialin "Vllaznia 2012" që do të zhvillohet në datat 9-12 mars në Shkodër, ndonëse ende nuk janë gjetur fondet për zhvillimin e tij, kanë filluar të konfirmojnë pjesmarrjen edhe shtetet e para. I pari që e ka bërë këtë gjë është ekipi kombëtar italian i cili në kuadrin e përgatitjeve për Olimpiadën "Londra 2012", e sheh aktivitetin e Shkodrës si një mundësi e mirë për sportistët e saj për të parë veten se ku janë me përgatitjet e tyre. Pikërisht, në një deklaratë të Federatës Italiane të Boksit Amator, bëhet e ditur se për Memorialin e Shkodrës, do vijnë për të marrë pjesë 4 boksierë, madje janë bërë të ditur edhe emrat dhe peshat e tyre.

Pak ditë më parë, Vllaznia në boks arriti një sukses historik: Festoi titullin e 21-të kampion. Padyshim që kjo është një arritje e madhe për këtë ekip dhe boksin shkodran në tërësi sepse tregon dominimin absolut të tij karshi ekipeve të tjera. Interesant është se në ditën e zhvillimit të finaleve, një veteran i boksit, Et'hem Ibrahimi u dhuroi të gjithë kampionëve librat e shkruar prej tij që flisnin për historinë e boksit shqiptar në vite.