BOKS

Gjithçka gati për Memorialin e 10-të ndërkombëtar të boksit "Vllaznia 2013". Kombëtarja shqiptare ka ditë që është grumbulluar në hotel "Argenti" ndërkohë që stërvitet intensivisht nën drejtimin e trajnerëve Zef Gjoni, Skënder Kurti dhe Jozef Sermi. Federata Shqiptare e Boksit ka bërë përzgjedhjen e sportistëve më të mirë të vendit që do të përfaqësojnë kombëtaren tonë në këtë aktivitet shumë të rëndësishëm ku siç dihet do marrin pjesë boksierë nga 13 vende të botës. Mbërritja e këtyre të fundit do të bëhet ditën e enjte ndërkohë që ndeshjet e ditës së parë do të nisin të premten pasdite.

Boksieri shkodran Kristian Demaj nuk ka arritur të fitojë as në ndeshjen e tij të tretë në ringun profesionist, pikërisht në atë të zhvilluar mbrëmjen e sotme ndaj irlandezit Joseph wWard. Takimi është zhvilluar në ringun e Londrës dhe ka qenë ballafaqimi i parë i çerekfinaleve në mes ekipit British Lionhearts dhe atij Mexico Guerreros ku bën pjesë Demaj. Ndeshja e këtij të fundit ka qenë e para e kësaj mbrëmje, e vlefshme për peshën deri në 85 kg. Demaj ka patur një rritje në krahasim me dy ndeshjet e mëparshme megjithatë, nuk ia ka dalë të fitojë. Në fund të pesë raundeve, gjyqtaria ka dhënë këto vlerësime: 50- 45, 50-45 dhe 50-45.

Problemet në marrjen e vizës kanë kaluar për boksierin shkodran Kristian Demaj. Ai ka gati një muaj që ndodhet në Meksikë ku ka vazhduar stërvitjen me ekipin e tij dhe ditët e fundit, ka patur problem marrjen e vizës angleze por edhe kjo pengesë ka kaluar sepse e ka marrë vizën pasditen e së mërkurës dhe menjëherë është nisur drejt Londrës për t'iu bashkuar ekipit të tij Mexico Guerreros në përgatitjet e fundit për përballjen me British Lionhearts.

Për boksierin shkodran Kristian Demaj vjen edhe ndeshja e tretë në boksin profesionist. Pikërisht më datën 22 mars në sallën sportive "York Hall" të Londrës do të zhvillohet takimi i parë i çerekfinale të World Series Boxing në mes ekipit vendas British Lionhearts dhe atij meksikan Mexico Guerreros, pjesë e të cilit është edhe boksieri ynë. Formati i kësaj lige gjysmëprofesioniste të boksit është si ai i Champions League në futboll me ndeshje në grupe e pastaj me eliminim direkt mes ekipeve në turet çerekfinale dhe gjysmëfinale.

Një nga boksierët më të mirë të historisë së këtij sporti në vendin tonë dhe sigurisht i Vllaznisë është edhe Dervish Efovija. Ai është një nga emrat e sportistëve për të cilët çdo vit në Shkodër organizohet edhe  Memoriali në kujtim të tyre dhe kontributit të tyre në këtë sport. Ai ka lindur në tokën shqiptare në Mal të Zi në vitin 1936 por i detyruar nga bomabrdimet e shumta, ai largohet nga Jugosllavia e atëhershme duke zgjedhur Shqipërinë dhe duke u vendosur në Shkodër. Në sajë të talentit të tij të përsosur në sportin e boksit, ai aktivizohet dhe përfaqëson Vllazninë duke u shpallur për disa vite kampion kombëtar. Më konkretisht ai është shpallur kampion kombëtar në vitet1953, 1954, 1955, 1956. Mbas peripecive të ndryshme që i ndodhin me Sigurimin e Shtetit, ai nga internimi në Llakatund të Vlorës dërgohet me makinë të mbyllur drejtëpërdrejtë në kufirin jugosllav në vitin 1958 sëbashku me babën, nanën dhe motrën.

Boksieri shkodran Kristian Demaj prej disa ditësh është duke u stërvitur në Meksikë. Për dikë mund të duket e çuditshme por siç e dimë, boksieri shkodran prej tre muajsh është pjesë e ekipit Mexico Guerreros që merr pjesë në Ligën gjysmëprofesioniste ëSB. Duke qenë kështu, ai ka udhëtuar drejt këtij vendi për t'u bërë gati për ndeshjen e rradhës, atë që do të zhvillohet gjatë këtij muaji.Ekipi i Demës ka fituar të drejtën të kalojë në fazën çerekfinale të kësaj Lige dhe për rrjedhojë gjatë këtij muaji do të jenë dy ndeshjet e rradhës për këtë tur në mes Mexico Guerreros dhe ekipit anglez British Lion Hearts.

Një muaj para nisjes së Memorialit të 10-të Ndërkombëtar të Boksit që do të zhvillohet si zakonisht në Shkodër në fillim të muajit prill, janë të shumta shtetet që kanë shprehur dëshirën e tyre për të marrë pjesë në këtë aktivitet të rëndësishëm. Grupi I punës që ka filluar të merret me këtë organizim, bën të ditur për televizionin Rozafa se deri ditën e sotme, kanë konfirmuar pjesmarrjen e tyre në këtë Memorial plot 10 shtete. Bëhet fjalë për Australinë, Rusinë, Italinë, Bullgarinë, Guinenë, Kosovën, Malin e Zi, Maqedoninë, Uzbekistanin dhe Skocinë.

Ndonëse duhet edhe një muaj për nisjen e Memorialit të 10-të Ndërkombëtar të boksit që zhvillohet në Shkodër, ekipi kombëtar shqiptar ka kohë që ka nisur përgatitjet për të. Megjithatë gradualisht ai po hyn në fazën më intensive të përgatitjeve. Për këtë arsye, duke filluar nga dita e sotme, kombëtarja shqiptare nën drejtimin e trajnerit Zef Gjoni ka nisur grumbullimin e parë. Ai do jetë njëjavor dhe po zhvillohet në Velipojë. Pjesë e ekipit për momentin janë boksierët Rexhildo Zeneli, Kristian Shytani, Xhulio Vrenozi, Bekim Vjerdha, Emanuel Kaçaj dhe Nelson Hysa.

Boksieri shkodran Kristian Demaj nuk ka mundur të bëjë realitet as sot fitoren e tij të parë në ringun profesionist. Ai është mundur nga boksieri rus Eduard Yakushev me rezultatin e tre gjyqtarëve të tavolinës 3-0. Në fakt, epërsia e boksierit rus ka qenë e pranishme në të 5 raundet e kësaj ndeshje. Ai ka bërë një ndeshje më të mirë dhe ajo që është parë qartë ka qenë forma fizike më e mirë e tij. Rezultatet përfundimtare të tre gjyqtarëve kanë qenë 49-46, 50-45 dhe 50-45 në favor të Yakushev.