SPORTE TE TJERA

Gjatë këtyre ditëve, në Elbasan është zhvilluar kupa "Pavarësia" në hendboll. Në këtë kupë, kanë marrë pjesë tre ekipet më të mira të vendit, pikërisht Tirana, Elbasani dhe Vllaznia. Ekipi shkodran ka arritur të dalë në finale të kësaj kupe teksa është ndeshur me vendasit e Elbasanit. Këta të fundit e kanë dominuar ndeshjen dhe e kanë mbyllur pjesën e parë në avantazh 15-8. Kjo epërsi ka ardhur duke u thelluar edhe në pjesën e dytë dhe në fund është fiksuar rezultati përfundimtar 32-21.

Më 25 nëntor, xhudistët e Albania Judo Kodokan, që përfaqëson sportistët e klubit Vllaznia në xhudo dhe të Vaut të Dejës, do të marrin pjesë në dy aktivitete të rëndësishme ndërkombëtare. Në Prishtinë do të organizohet me këtë datë kupa "Adem dhe Hamz Jashari". Ky aktivitet do të mbahet në qendrën sportive me të njëjtin emër dhe në të do marrin pjesë xhudistë nga disa vende të Rajonit dhe në disa kategoria. Albania Judo Kodokan do të përfaqësohet me këta sportistë: Krismando Bisha (60 kg junior), Leonard Qafiku (66 kg senior), Xhulio Kaci (73 kg junior), Aldo Shkoza (81 kg senior) dhe Ndoc Ndoci (100 senior).

Federata Shqiptare e Pingpongut ka vendosur që të organizojë në Shkodër një takim mbarëkombëtar pikërisht në kuadrin e aktiviteteve organizuar në nderim të 100 Vjetorit të Pavarësisë. Kjo bëhet e ditur nga sekretari i kësaj Federate, shkodrani Tonin Binoshi. Në të do të marrin pjesë sportistët më të mirë nga Shqipëria, Kosova dhe Mali i Zi. Ai do të zhvillohet në datat 26-27 nëntor në pallatin e sportit "Qazim Dervishi".

Federata Shqiptare e Çiklizmit sot ka patur rradhën për të zhvilluar Asamblenë Zgjedhore të saj. Kjo Asamble është shoqëruar edhe me ndryshime të rëndësishme në krye të Federatës. Pas tre mandatesh, president i saj nuk do jetë më Skënder Anxhaku. Në vend të tij është zgjedhur sot Ervin Lika. Ka qenë një garë e fortë mes këtyre dy kandidatëve dhe në fund ka fituar ish-çiklisti i ekipit tonë kombëtar. Lika për një periudhë të shkurtër ka garuar edhe me Vllazninë, pastaj ka bërë për Tiranën, Apoloninë dhe ka vazhduar sportin në Itali. Ai ka lindur në Koplik dhe në këtë mënyrë, Veriu tashmë do krenohet me djalin e saj.

Ato çfarë po ndodhin dhe çfarë pritet të ndodhin me ekipet e klubit shumësportësh Vllaznia, e kanë marrë një përgjigje nga ana e kryebashkiakut të Shkodrës Lorenc Luka. I ftuar në emisionin "Euro Dita" në televizionin Rozafa, ai është detyruar t'i përgjigjet disa mesazheve të dërguara nga disa sportistë të këtij klubi për shkurtimin e fondeve të tyre me 40 për qind në këtë periudhë.

Dita e sotme ka dhuruar sfidën shumë interesante në kampionatin kombëtar të shahut për meshkuj në mes ekipeve të Teutës dhe Vllaznisë. Këto dy ekipe mbanin vendin e parë dhe të dytë deri ditën e sotme, që është edhe e parafundit e kampionatit. Shahistët shkodranë në rast fitoreje ndaj durrsakëve, mund të siguronin vendin e parë dhe të shpalleshin kampionë të vendit por nuk ka ndodhur kështu. Në takimin e sotëm mes këtyre dy ekipeve, ka qenë Teuta ajo që ka triumfuar duke fituar me rezultatin e pastër 4-0, çka do të thotë se shahistët e saj kanë triumfuar në të katër tavolinat ndajt atyre të Vllaznisë dhe pikërisht Ashikut, Adhamit, Tavasjes dhe Nakos.

Ekipi i Vllaznisë në shah vazhdon paraqitjen e mirë në kampionatin kombëtar edhe pas ditës së katërt. Në këtë ditë, ai ka mundur ekipin e Lushnjës me rezultatin e pastër 4-0. Pas këtij turi, shkodranët kanë arritur të grumbullojnë 10 pikë duke qenë kështu edhe pas këtij turi në vendin e dytë në renditje teksa udhëheq Teuta e Durrësit me 2 pikë më shumë.Shahistët që përfaqësojnë Vllazninë në këtë kampionat janë këto. Në tavolinën e parë është Franc Ashiku, në të dytën Vangjel Adhami, në të tretën Elvis Tavasja, në të katërtën Gëzim Noka ndërsa rezërvë janë Muhamet Gradeci që ka edhe detyrën e trajnerit dhe Bernard Leka.