Shkruar nga Endri ÇINARI
E ardhmja e Erald Çinarit është tashmë drejt zgjidhjes. “Shkodra Sport” mëson ekskluzivisht se sulmuesi shkodran do ta vazhdojë karrierën në kampionatin elitar të Koresë së Jugut, duke nisur një aventurë të re në një nga ligat më të forta të kontinentit aziatik. Bëhet fjalë për një marrëveshje që ndodhet në fazën përfundimtare të procedurave, ndërsa zyrtarizimi pritet të vijë shumë shpejt.
Sipas informacioneve të siguruara nga “Shkodra Sport”, 29-vjeçari do të firmosë një kontratë 1.5-vjeçare me klubin e tij të ri, e cila do të përmbajë edhe një opsion rinovimi për një sezon tjetër. Për momentin emri i skuadrës nuk bëhet publik, pasi palët janë duke mbyllur detajet e fundit të marrëveshjes, por gjithçka tregon se transferimi është praktikisht i mbyllur.
Për Çinarin kjo do të jetë një tjetër eksperiencë ndërkombëtare në një karrierë që ka kaluar në disa kampionate të ndryshme. Pas paraqitjeve në futbollin shqiptar me Vllazninë dhe Partizanin, ai provoi veten në Turqi me Samsunspor, në Maqedoninë e Veriut me Shkëndijën, në Armeni me Noah, ndërsa eksperienca e fundit ishte në Arabinë Saudite me Al Jabalain. Tashmë destinacioni i radhës do të jetë Koreja e Jugut, duke i shtuar një tjetër kampionat prestigjioz CV-së së tij.
Kalimi në elitën koreano-jugore konsiderohet një hap i rëndësishëm për sulmuesin shkodran, jo vetëm nga ana sportive, por edhe për nivelin e lartë organizativ dhe konkurrues që ofron ky kampionat. Futbolli në Korenë e Jugut është në rritje të vazhdueshme dhe ka fituar prej kohësh reputacion si një ndër destinacionet më serioze për futbollistët e huaj që kërkojnë të zhvillojnë karrierën në Azi.
Nga sa mësohet, transferimi pritet të jetë mjaft i favorshëm edhe në aspektin financiar për Çinarin, i cili do të përfitojë një kontratë të rëndësishme në vitet më të mira të karrierës së tij. Nëse nuk do të ketë surpriza të minutave të fundit, zyrtarizimi i marrëveshjes pritet të vijë në ditët në vijim, duke konfirmuar kështu një tjetër hap të rëndësishëm në rrugëtimin profesional të futbollistit shkodran.
Burimi: Gazeta “Shkodra Sport”
