Shkruar nga Endri ÇINARI
Pas përfundimit të huazimit te Vllaznia, Kevin Dodaj është rikthyer te CSKA Sofia, klubi bullgar që zotëron kartonin e sulmuesit shkodran. 21-vjeçari kaloi pjesën e dytë të sezonit me fanellën kuqeblu, duke fituar minuta të rëndësishme dhe duke qenë një alternativë në repartin ofensiv të ekipit shkodran. Tashmë, me përfundimin e aventurës së tij në Shqipëri, vëmendja është zhvendosur te hapi i radhës në karrierën e futbollistit.
Sipas informacioneve që mëson gazeta, Kroacia po shfaqet gjithnjë e më shumë si një destinacion i mundshëm për Dodajn. Interes për shërbimet e tij ka shfaqur Gorica, skuadër që militon në elitën e futbollit kroat dhe që po vlerëson mundësinë e afrimit të sulmuesit gjatë kësaj vere. Për momentin nuk ka asgjë të mbyllur, por pista kroate mbetet një nga më të nxehtat për të ardhmen e lojtarit.
Natyrisht, çdo lëvizje e mundshme kalon fillimisht nga CSKA Sofia. Klubi bullgar vazhdon të besojë te potenciali i Dodajt dhe nuk duhet harruar fakti se verën e kaluar investoi mbi 450 mijë euro për ta transferuar nga Vllaznia. Pikërisht për këtë arsye, drejtuesit e klubit do të kërkojnë formulën më të favorshme përpara se të japin dritën jeshile për largimin e tij.
Ndërkohë, merkatoja mbetet e hapur dhe situata e sulmuesit pritet të ndiqet me interes. Në moshën 21-vjeçare, Dodaj vazhdon të konsiderohet një futbollist me perspektivë dhe një kampionat si ai kroat mund të përfaqësojë një hap të rëndësishëm në zhvillimin e tij. Për momentin, Gorica duket pista më konkrete, ndërsa mbetet për t’u parë se ku do ta vazhdojë karrierën një nga talentet që në vitet e fundit ka dalë nga futbolli shkodran.
Burimi: Gazeta “SHKODRA SPORT”
