Premier League ofroi një duel midis Liverpoolit dhe Sheffield United. Ky takim i javës së gjashtë të kampionatit anglez ishte shumë intensiv që nga fillimi dhe “të Kuqtë” u përpoqën të gjenin golin e avantazhin shumë shpejt.
Mirëpo, ishte Sheffield United që kaloi i pari në avantazh pas një penallti të shkaktuar nga Fabinho. Norvegjezi Sander Berge mori përsipër goditjen e penalltisë, duke mposhtur portierin Alisson (1-0, 13).
“Blades” më pas u përpoqën të dyfishojnë rezultatin me ofensivat nga Oliver McBurnie dhe Ben Osborn , por në fund ishte Liverpool që të shënonte.
Kampionët në fuqi të Premier League vendosën baraspeshën me Firminhon në fundin e pjesës së parë, i cili e pati të thjeshtë të shtynte drejt rrjetës topin e kthyer nga portieri pas tentativës së Manesë me kokë.
Salah e kaloi topin pas shpinës së portierit sapo nisi minuta e 63-të, por pamjet e përsëritura treguan qartë se ishte në pozicion të parregullt. Gjithsesi, Liverpooli mori atë që kërkonte në këtë takim, pasi në minutën e 64-t Jota shfrytëzoi krosimin e Manesë për golin e fitores.
