Shkruar nga Endri ÇINARI
Trajneri Csaba Laszlo duket se ka fituar mbështetjen e tifozëve të Vllaznisë, pavarësisht humbjes 3-1 ndaj Egnatias në Rrogozhinë. Edhe pse shkodranët u larguan pa pikë nga kjo transfertë, paraqitja e skuadrës dhe loja e zhvilluar në disa momente kanë ngrohur disi tifozët kuqeblu, të cilët kanë parë shenja të një ndryshimi në mënyrën se si ekipi interpreton ndeshjet.
Pakënaqësitë e mbështetësve të Vllaznisë kanë qenë të pranishme që në fillimin e sezonit, veçanërisht për mënyrën se si u ndërtua skuadra. Kritikat janë drejtuar ndaj drejtuesve të klubit, por edhe ndaj stafit teknik që e nisi këtë edicion, me kuqeblutë që nuk arritën të bindnin as me lojë dhe as me rezultate në javët e para të kampionatit.
Një tjetër pikë që ka shkaktuar diskutime mes tifozëve është edhe niveli i disa futbollistëve të afruar gjatë merkatos. Sipas një pjese të mbështetësve, jo të gjithë lojtarët kanë treguar se i përmbushin pritshmëritë për të qenë pjesë e një klubi me historinë dhe objektivat e Vllaznisë. Këto kritika bëhen edhe më të forta kur merren parasysh pagat e larta që përfitojnë disa prej futbollistëve, prej të cilëve pritet më shumë përgjegjësi dhe cilësi në fushën e lojës.
Megjithatë, ardhja e Laszlos duket se ka sjellë një frymë tjetër në skuadër. Trajneri hungarez ka pasur vetëm pak kohë në dispozicion, por në këto dy javë ka arritur të fitojë një pjesë të mirë të simpatisë së tifozëve, të cilët kanë vlerësuar sinjalet e dhëna nga ekipi. Edhe pse rezultati në Rrogozhinë ishte negativ, paraqitja ndaj Egnatias ka lënë përshtypjen se Vllaznia mund të bëjë më shumë në vazhdim.
Tashmë, mbështetja e tifozëve duhet të shndërrohet në një shtysë për skuadrën dhe stafin teknik. Laszlos i duhet të ndërtojë mbi ato elemente pozitive që u panë në këtë transfertë, duke korrigjuar njëkohësisht gabimet që vijojnë t’i kushtojnë pikë ekipit. Në një kampionat ku rezultatet kanë rëndësi të veçantë, përmirësimi i lojës duhet të shoqërohet edhe me pikë në klasifikim.
Në fund, simpatia e fituar në vetëm dy javë është një sinjal inkurajues për trajnerin hungarez, por jo një garanci për vazhdimësinë. Tifozët shkodranë presin që ndryshimi të jetë i qëndrueshëm dhe këtë mund ta dëshmojnë vetëm rezultatet pozitive në ndeshjet e ardhshme. Për Vllazninë, sfida e vërtetë tani është që sinjalet e mira të kthehen në fitore dhe besimi i rifituar të mos mbetet thjesht një reagim pas një paraqitjeje më bindëse.
Burimi: Gazeta “Shkodra Sport”
