Shkruar nga Endri ÇINARI
Vllaznia është rikthyer menjëherë te rezultatet negative në kampionat, duke u mposhtur me shifrat 3-1 nga Egnatia në transfertën e Rrogozhinës, në kuadër të javës së shtatë të Superiores. Pas fitores 1-0 ndaj Dinamos një javë më parë, shkodranët nuk kanë arritur të marrin një rezultat pozitiv, duke u larguar sërish pa pikë nga fusha e lojës. Një tjetër goditje për kuqeblutë, që vazhdojnë të vuajnë në këtë fillim sezoni, pavarësisht sinjaleve pozitive të shfaqura në ndeshjet e fundit.
Megjithatë, përtej rezultatit dhe shijes së hidhur që lë kjo disfatë, ajo që ra më shumë në sy në Rrogozhinë ishte paraqitja e skuadrës shkodrane. Nën drejtimin e trajnerit hungarez Csaba Laszlo, nëntë herë kampionët e vendit duket se kanë ndryshuar disi fytyrë, duke shfaqur një tjetër qasje në lojë dhe më shumë ide në aspektin ofensiv. Një Vllazni që nuk u mjaftua vetëm me mbrojtjen, por kërkoi të luante futboll dhe të rivalizonte denjësisht përballë një prej skuadrave më të forta të kampionatit.
Kuqeblutë zhvilluan një ndeshje në nivel të kënaqshëm, duke treguar ritëm, dëshirë dhe aftësi për të ndërtuar aksione të rrezikshme. Shkodranët arritën të krijonin disa raste të pastra shënimi, duke vënë në vështirësi prapavijën e Egnatias dhe duke dëshmuar se kanë potencial për të prodhuar më shumë në fazën sulmuese. Një paraqitje që, edhe pse nuk u shpërblye me pikë, tregoi se skuadra e Laszlos po përpiqet të gjejë një identitet të ri në fushën e lojës.
Nëse do të kishte pak më shumë fat dhe, mbi të gjitha, më shumë saktësi në momentet vendimtare, historia e kësaj përballjeje mund të kishte qenë ndryshe për Vllazninë. Shkodranët patën mundësitë e tyre për të përfituar nga hapësirat e krijuara dhe për ta mbajtur ndeshjen të hapur deri në fund. Në këto kushte, një barazim nuk do të ishte aspak i pamerituar për kuqeblutë, duke parë lojën e zhvilluar dhe rastet e krijuara përballë kampionëve në fuqi.
Sigurisht, futbolli nuk njeh vetëm paraqitjet e mira, por mbi të gjitha rezultatet. Vllaznia largohet nga Rrogozhina me një tjetër humbje, duke mos arritur të ndërtojë vazhdimësinë që pritej pas suksesit ndaj Dinamos. Për një skuadër me objektiva të rëndësishëm, nuk mjafton të luash mirë apo të krijosh raste, nëse në fund nuk arrin të marrësh diçka konkrete nga ndeshjet. Pikërisht këtu qëndron edhe sfida më e madhe për Laszlon dhe futbollistët e tij në javët në vijim.
Gjithsesi, paraqitja ndaj Egnatias mund të shërbejë si një pikënisje për të ardhmen. Vllaznia ka treguar se mund të konkurrojë dhe të krijojë probleme edhe për kundërshtarë të nivelit të lartë, por tani duhet ta shndërrojë këtë lojë në pikë. Sepse në futboll, paraqitjet pozitive mund të japin shpresë dhe të ndërtojnë besim, por janë rezultatet ato që bëjnë diferencën. Për kuqeblutë, hapi i radhës është i qartë: të ruajnë sinjalet pozitive të Rrogozhinës dhe t’i shoqërojnë ato me pikë, të cilat janë më të nevojshme se kurrë.
Burimi: Gazeta “Shkodra Sport”
