Myrto Uzuni do të kryejë një udhëtim “flash” nga Spanja për t’i ardhur në ndihmë Shqipërisë për përballjen miqësore me Italinë, që zhvillohet mbrëmjen e sotme në “Air Albania”.
Sulmuesi kuqezi, pjesë e Granadës në La Liga 2, ka marrë leje nga klubi i tij për të qenë pjesë e Kombëtares në këtë miqësore luksi.
Në fakt, La Liga 2 në Spanjë nuk do të ndërpritet në këtë periudhë të Botërorit, por Uzuni i ka bindur drejtuesit e Granadës për t’u shkëputur për pak ditë, teksa në fundjavë do të jetë sërish në Spanjë, për ndeshjen me Albaceten të premten.
Prania e Uzunit për ndeshjen miqësore me Italinë shton forcën e Shqipërisë në fazën e avancuar, teksa ai pritet të jetë titullar në sulm së bashku me Armando Brojën, pasi “bomberi” beratas po kalon një formë të shkëlqyer, ku rezulton të jetë golashënuesi më i mirë i La Liga 2 me tetë gola.
Maringlen ZHIVANI
