Vllaznia do udhëtojë drejt Korçës në javën e 22-të të Superligës, ku përballë do ketë vendasit e Skënderbeut. Një ndeshje shumë e komplikuar paraqitet për shkodranët, që do kenë si kundërshtar ekipin e fundit të tabelës me vetëm 16 pikë të grumbulluara. Kjo i bën korçarët të rrezikshëm, pasi nevoja jetike për pikë do bëjnë që skuadra të luftojë fort.
Por nga ana e tyre edhe shkodranët nuk duan të shkëputen akoma më tepër nga treshja e parë. E patjetër që 3 pikëshi është një objektiv në këtë takim. Statistikat e përballjeve të fundit flasin për një balancë mes ekipeve. Duke marrë transfertat që kanë pasur kuqeblutë në Korçë janë në pozita të njëjta.
Kështu takimi i fazës së parë këtë sezon u mbyll me rrjetat e paprekura me shifrat 0-0. Në sezonin 2020-21, Vllaznia arriti një fitore 0-2 në Korçë në fazën e parë me golat e Dilaver dhe Da Silva.
Po ashtu sezonin e shkuar ishte një barazim 1-1, në fazën e tretë me një gol nga Dilaver. Skënderbeu ka arritur të fitojë përballë shkodranëve në shtëpi në edicionin 2019-20.
Bardhekuqtë triumfonin 2-1 ku vendoste një gol në fund i Pusit. Më parë për korçarët kishte shënuar Gripshi e ndërsa për kuqeblutë kishte barazuar përkohësisht Krymi. Pra statistikat e 4 ndeshjeve të fundit në Korçë tregojnë për një barazi totale, ku numërohen nga 1 fitore për secilën skuadër dhe 2 barazime. Do shihet të premten nëse kjo balancë do ruhet apo do prishet nga ana e ndonjërës skuadër.
Endri ÇINARI
