Cristiano Ronaldo është prezantuar sot si lojtari më i ri i Al-Nassr-it dhe ka nënshkruar kontratë me klubin nga Arabia Saudite për 2.5 vjet, sipas së cilës do të fitojë 200 milionë euro në vit.
Kjo është kontrata më e madhe në historinë e futbollit. Ronaldos iu dha mundësia për të rritur më tej pasurinë e tij. Ronaldo ka mbajtur një konferencë për shtyp para prezantimit në stadium.
“Shumë njerëz flasin për futbollin dhe japin mendime, por jo shumë njerëz dinë për të. Në 10-15 vitet e fundit, futbolli ka ndryshuar dhe skuadrat janë padyshim më të përgatitura. Nëse e lëshoni qoftë edhe për një moment, do të humbisni. Nëse shikojmë Botërorin e fundit, e vetmja skuadër që mundi kampionët aktualë të botës ishte Arabia Saudite. Jam i lumtur që jam këtu. Për të qenë i sinqertë, nuk më intereson çfarë thonë të tjerët. Ky kampionat është i fortë dhe shumë i ekuilibruar dhe unë dua ta bëj atë edhe më të mirë.
Për mua nuk është vetëm një sfidë sportive, por edhe një mundësi për të ndryshuar mentalitetin e brezit të ri, pak njerëz e dinë këtë, por më donin klube nga SHBA, Australia apo Portugalia, por unë preferova të vij këtu. Unë dua të zhvilloj jo vetëm futbollin por edhe pjesë të tjera të këtij vendi të madh, e di çfarë dua dhe çfarë nuk dua, dua të ndaj njohuritë dhe përvojën time dhe të ndryshoj gjërat për mirë.
Për momentin, ndihem mirë këtu dhe jam krenar që kam marrë këtë vendim të madh në karrierën dhe jetën time. Puna ime në Evropë ka përfunduar. Kam luajtur për klubet më të mëdha të botës, kam fituar gjithçka që duhet të fitoj. Tani jam duke u përballur me sfida të reja në Azi dhe jam mirënjohës që Al-Nassr më dha këtë mundësi. Dua të frymëzoj brezat e rinj të futbollistëve. Është një sfidë për mua, por jam krenar dhe i lumtur për këtë.”
Ai është pyetur edhe për kontratën e çmendur që ka marrë dhe Ronaldo është përgjigjur duke buzëqeshur: “Kam marrë një kontratë të veçantë, por jam edhe i veçantë, kështu që është normale”. /Sport Ekspres/
