Vetëm pas pak ditësh, pushimet për futbollistët e Vllaznisë do të marrin fund dhe ata do t’i rikthehen sërish stërvitjes. Kjo është planifikuar të ndodhë më 10-qershor dhe 10-ditë më vonë, ekipi kuqeblu pritet të lërë qytetin e tij, për t’u spostuar në një kamping sportiv, ku do të zhvillojë edhe periudhën më intensive të përgatitjeve për ndeshjet e Kupave të Europës.
Drejtuesit e klubit janë duke parë disa alternativa si në Mal të Zi, Maqedoninë e Veriut, Serbi apo edhe Bosnje, por ende nuk është vendosur se ku do ta zhvillojnë.
Tashmë, siç dihet Vllaznia, do të luajë ndeshjet e turit të parë të “Conference League” në mesin e muajit korrik dhe një gjë e tillë do të thotë se skuadra kuqeblu do të duhet t’i rikthehet paska më herët fushës së stërvitjes.
Nga sa bëhet e ditur, drejtuesit e klubit kanë lajmëruar futbollistët se më datë 10-qershor do të rikthehen në fushë. Tashmë planet po bëhen dita-ditës, por më përpara duhet plotësuar edhe skuadra akoma më tepër me futbollistët e duhur, me drejtuesit që po vijojnë të punojnë akoma për të bërë lëvizjet e duhura në merkato, si në hyrje ashtu edhe në dalje, për të ndërtuar skuadrën e sezonit të ri.
Maringlen ZHIVANI
