Vetëm pak minuta iu deshën Mehdi Çobës për të qenë protagonist në ndeshjen që Vllaznia zhvilloi kundër Skënderbeut. Sulmuesi u fut në minutën e 84-ët në fushën e lojës dhe arriti të asistonte në golin e dytë të shënuar nga Aralica.
Një aksion model mes Jonuzit-Aralicas dhe Çobës që shërbeu në mënyrë perfekte për kroatin, i cili e dërgoi topin në rrjetë. Vetëm 5 minuta në fushë për të qenë edhe ai një ndër personazhet e kuqebluve në këtë 3 pikësh kundër Skënderbeut.
Shpërthimet e tij në krah dhe shpejtësia janë ato që karakterizojnë 21-vjeçarin. Patjetër që edhe nuhatja e golit nuk mungon për mëngjërashin. Performancat e Çobës ishin realisht pozitive në fillim të sezonit, ku edhe madje shënoi kundër Siroki Brijeg në Conference League. Gol që kualifikonte në fund Vllazninë.
Por me kalimin e javëve duket se sulmuesi humbi vendin e tij si protagonist. Gjithsesi forma e treguar së fundmi tregon se Çoba është gati dhe të japë kontributin e tij. Kjo patjetër që kënaq të gjithë në kampin kuqeblu pasi të gjithë duan që opsionet të jenë sa më të shumta në çdo repart dhe pozicion.
Endri ÇINARI
