Dy ndeshjet e fundit të Vllaznisë kanë qenë disi më të veçuara nga ajo se çfarë kanë bërë shkodranët përgjatë këtyre 12-takimeve të luajtura deri më tani. Kështu mund të thuhet, sepse deri dy javë më parë, fundi i takimit tregonte për një Vllazni të shthurur, sepse disa prej golave të pësuar deri më tani kanë ndodhur në 20-minutat e fundit, katër të tillë.
Skuadra transformohej tërësisht në fund, duke lënë shumë hapësira dhe duke i dhënë mundësinë kundërshtarëve që ta kenë më të lehtë të shkojnë në rrugën e rrjetës. Një defekt që duhet riparuar medoemos kur ekipi të dalë në fushë pas pushimeve, pasi në të kundërt do ta kenë shumë të vështirë të arrijnë te vendi i parë.
Në total, Vllaznia gjatë pjesës së parë ka shënuar shtatë herë, ndërsa në të dytën pesë, duke qenë pak a shumë e balancuar. E njëjta gjë nuk mund të thuhet për rrjetat e pësuara, teksa në të parën ka pësuar tre gola, ndërsa në fraksionin e dytë plot nëntë të tillë.
Nga ana tjetër, Vllaznia duket se është më efikase në pjesën e parë. Shkodranët e nisin mirë ndeshjen, teksa nga 12-gola të shënuar, shtatë të tillë janë realizuar në 45-minutëshin e parë.
Ndërkohë, po në pjesën e parë kanë pësuar vetëm tre gola. Sa i përket pjesës së dytë, shkodranët kanë shënuar pesë herë dhe kanë pësuar plot nëntë gola, duke mos qenë shumë të balancuar në këtë aspekt.
Maringlen ZHIVANI
