Shkruar nga Endri ÇINARI
Vllaznia e mbylli sezonin 2025-26 si një nga skuadrat më produktive në aspektin ofensiv në Superiore. Me 42 gola të realizuar gjatë sezonit të rregullt, kuqeblutë renditeshin ndër sulmet më të mira të kampionatit, duke konfirmuar potencialin e tyre në fazën sulmuese. Megjithatë, ajo që e veçon ekipin shkodran nga rivalët nuk është thjesht numri i golave, por mënyra se si ato u shpërndanë mes futbollistëve të ndryshëm.
Ndryshe nga shumë skuadra që varen kryesisht nga një ose dy realizatorë, Vllaznia arriti të ndërtojë një repart ofensiv ku kontributi erdhi nga pothuajse të gjitha repartet e fushës. Në total, 14 futbollistë të ndryshëm gjetën rrugën e rrjetës gjatë kampionatit, një statistikë që dëshmon balancën dhe alternativat që kishte në dispozicion trajneri Edi Martini.
Sigurisht, lideri i sulmit mbeti Bekim Balaj. Kapiteni kuqeblu mbajti peshën kryesore të repartit ofensiv me 13 gola, duke qenë pika e referimit në vijën e parë. Pas tij erdhën Kallaku me 5 realizime dhe Dodaj me 4, ndërsa kontribut të rëndësishëm dhanë edhe Mala e Jago me nga 3 gola secili.
Por shifrat tregojnë se Vllaznia nuk ishte vetëm Balaj. Futbollistë si Bismark, Kastrati dhe Murataj shtuan nga dy gola në llogarinë personale, ndërsa emra si Ara, Bajrami, Gurishta, Hakaj, Tafili dhe Qato kontribuuan gjithashtu me realizimet e tyre në momente të ndryshme të sezonit.
Kjo statistikë konfirmon se Vllaznia kishte një repart ofensiv të mirëbalancuar gjatë sezonit 2025-26. Fakti që 14 futbollistë të ndryshëm arritën të shënonin tregon se kuqeblutë nuk u mbështetën vetëm te një emër i vetëm për golat, por gjetën zgjidhje në shumë lojtarë përgjatë kampionatit. Një element pozitiv për skuadrën shkodrane, e cila edhe këtë sezon u rendit mes ekipeve më efikase në fazën sulmuese.
Burimi: Gazeeta “SHKODRA SPORT”
