Nuk ka më shpresë për Kristal Abazajn tek ekipi i Anderlechti-t. Sulmuesi anësor e ka kuptuar dhe vetë se nuk mund të çajë në skuadrën belge dhe po kalon një “ferr”. Shqiptari po luan me ekipin e 23-vjeçarëve dhe nuk ka zbritur asnjëherë në fushë me skuadrën e parë. Trajneri nuk është aspak i bindur me të dhe nuk e ka në plane, ashtu si shumë të tjerë.
Mediet belge informojnë opinionin sportiv se gjigantët e Belgjikës do të bëjnë spastrime në janar dhe priten të largohen 12 futbollistë. Në mesin e tyre nuk mund të mungonte dhe ish-lojtari i Skënderbeut që u transferua në verë nga Shqipëria drejt kampionatit belg.
Dennis Appiah, Ognen Vranjes, Dennis Apiah, Ryota Morioka, Antonio Milic, Knowledge Musa, Luka Adzic, Kristal Abazaj, Mohammed Dauda, Emanuel Sowah, Edo Kayembe dhe Hannes Delcroix pritet të largohen. Të gjithë së bashku mund të grumbullojnë rreth 18 milionë euro që do t’i shërbejnë belgëve për të plotësuar dëshirat e tyre në merkaton e janarit. Ata duan 2 mbrojtës dhe një sulmues për të përmbushur objektivat e tyre.
