Tirana do të luajë të shtunën në transfertë kundër Vllaznisë, ndeshje e vlefshme për javën e 21-të të Superiores. Bardheblutë vijnë në këtë takim pas humbjes 1-0 kundër Teutës, ndërsa shkodranët pas barazimit 1-1 në transfertën e Korçës.
Në të dy kampet janë të uritur për pikë. Kampionët duhet të marrin 3 pikë për t’iu afruar zonës së Europës, ndërsa kuqeblutë për të vijuar të qetë rrugëtimin në krye të tabelës së klasifikimit.
Kujtojmë që në fazën e parë, Vllaznia arriti të fitonte në “Loro Boriçi” me rezultatin 3-2, pas një goli të realizuar në minutën e fundit nga Dunga.
Në fazën e dytë, skuadrat u njoftuan me një barazim 1-1 në “Selman Stërmasi”, ndërsa në të tretën pritet të shihet të shtunën në orën 13:00.
Deri më tani shkodranët kanë treguar vlerat e tyre duke grumbulluar plot 4 pikë në 2 ndeshje, ndërsa kryeqytetasit vetëm 1. Pritet me interes të shihet kjo sfidë që do të vendosë shumë për fatet e të dy skuadrave./newsport/
