Tifozët e Real Madridit shpresojnë që Toni Kroos të vazhdojë kontratën me klubin edhe për një sezon tjetër. Megjithatë, gazeta Marca, një ditë pas kalimit të Real Madridit në finalen e Ligës së Kampionëve, po nxit frikën duke deklaruar se mesfushori gjerman mund të ketë luajtur ndeshjen e tij të fundit për klubin madrilen në Santiago Bernabeu.
Vetë Kroos ka theksuar se dëshiron të pensionohet me fanellën e Realit, por sipas kushteve të tij, kur të jetë në kulmin e fuqisë së tij.
Së fundmi ai tha se nuk ka marrë një vendim se çfarë do të ndodhë në fund të sezonit. Për shkak të gjithë kësaj, skenat pas ndeshjes ndaj Bayernit po i trembin tifozët e klubit.
Ata pyesin nëse ishte ndeshja e fundit e sezonit në Ligën e Kampionëve në Bernabeu dhe e fundit për Kroos në këtë garë para tifozërisë vendase. Arsyeja bëhet nga gazeta Marca, e cila shkruan se 34-vjeçari gjerman, pasi ëstë zbrazur Bernabeu, është kthyer në fushë, fillimisht është ulur në stol, e më pas në bari. Pak më vonë iu bashkuan gruaja dhe fëmijët.
Nuk dihet nëse Kroos, katër herë fitues i Ligës së Kampionëve dhe katër herë fitues i La Ligës, thjesht po shijonte momentin apo po i thoshte lamtumirë stadiumit.
Mediat spanjolle thonë se kjo nuk është sjellja e tij e zakonshme dhe se nuk do të ishte çudi nëse ai mendonte të largohej pas fitores së kampionatit spanjoll dhe një trofeu të ri të mundshëm në Ligën e Kampionëve. /Telegrafi/
