Shkruar nga Gjergj KOLA
Tjetër paraqitje e mirë e mundësve shkodranë edhe në aktivitetin e rradhës ku ata kanë marrë pjesë. Bëhet fjalë për kampionatin kombëtar U15 dhe U17 që u zhvillua ditën e shtunë në pallatin e sportit “Ramazan Njala” të Durrësit.
Në kategorinë U15, figurën më të mirë e ka bërë sportisti Jasin Cekaj i cili duke konkurruar në peshën -85 kg ka zënë vendin e parë dhe është shpallur kampion kombëtar. Po për këtë grupmoshë, sportisti tjetër Unejs Hafizi ka konkurruar në peshën -68 kg dhe është renditur në vendin e tretë.
Ndërkohë në kategorinë U17 kemi dy sportistë që janë shpallur kampionë në peshat e tyre. Kështu, në atë -65 kg mundësi Eglis Mhillaj ka zënë vendin e parë dhe është shpallur kampion kombëtar për këtë peshë. Ndërsa në peshën -92 Enes Anza po ashtu është shpallur kampion dhe njëkohësisht ka marrë edhe kupën si sportisti më i mirë i kampionatit.
Po në peshën -92 Alvaro Malaj është renditur i katërti, ndërsa në podium është ngjitur edhe Everes Nika i cili në peshën 110 kg ka zënë vendin e tretë.
Si rrjedhojë e këtyre arritjeve, ekipi i Vllaznisë në fund të të gjitha ndeshjeve të kampionatit është renditur në vendin e tretë në garën ekipore. Padyshim që ky është një tjetër tregues se nën drejtimin e trajnerit Altin Anza aty po punohet shumë mirë dhe rezultatet nga gara në garë vijnë gjithnjë duke u rritur.
Burimi: Gazeta “Shkodra Sport”
