Shkruar nga Maringlen ZHIVANI
Vllaznia U16 ka hedhur një hap të rëndësishëm drejt titullit kampion, teksa ka marrë një fitore të vlefshme në transfertë ndaj Teutës në Durrës me rezultatin 0-2. Golat u shënuan nga i përhershmi, sulmuesi Daniel Marku dhe Hoxha, ky i fundit i ardhur nga stoli.
Pas këtij suksesi, skuadra shkodrane mban vendin e parë në renditje dhe tashmë gjithçka do të vendoset në ndeshjen e fundit të sezonit ndaj Tiranës U16, e cila pritet të zhvillohet në Shkodër. Në rast se Tirana fiton ndeshjen e saj të radhës, dy ekipet do të barazohen me pikë, por Vllaznia ruan avantazhin falë rezultateve në përballjet direkte.
Kjo do të thotë se kuqeblutë kanë në dorë fatin e tyre. Një barazim në ndeshjen e fundit mjafton për t’u shpallur kampionë. Takimi vendimtar është planifikuar të zhvillohet më 15 ose 16 maj në fushën sportive “Reshit Rusi”, ku pritet edhe mbështetja e tifozëve për të shtyrë ekipin drejt titullit.
Formacioni i Vllaznia U-16: Shpuza, Kullolli, Gjoni, Osja, Luka, Gjeka, Kopliku, Marku, Hysa, Fangaj, Sukaj (u aktivizuan: Hasanaj, Hoxha, Gjeta, Mlloja, Duka) Tr: Haris Dalipi
Burimi: Gazeta “Shkodra Sport”
