SHKODRANET NEPER BOTE

Mbrojtësi shkodran Klodian Semina është duke luajtur titullar në thuajse të gjitha ndeshjet me ekipin e kategorisë së dytë në Zvicër- Lokarno. Ka ndodhur kështu edhe dje kur ka qenë për 90 minuta në fushë, në ndeshjen që ekipi i tij ka luajtur ndaj Bielit. Rezultati përfundimtar i këtij takimi ka qenë 2-0 për Lokarnon, me dy gola të shënuar nga elbasanasit Armando Sadiku. Sipas vetë Seminës, në një prononcim ekskluziv për gazetën online www.shkodrasport.com, fitorja e djeshme ka qenë shumë e rëndëisshme për skuadrën e tij. "Ka qenë një fitore me mjaft vlera. Kemi fituar ndaj Bielit, një kundërshtar direkt për ne. Por në këtë ndeshje, kam marrë edhe karton të verdhë, që ishte i katërti për mua dhe prandaj do të mungoj në ndeshjen e rradhës. Megjithatë, tashmë jemi në vend të 10-të me 6 pikë më shumë në renditje, në pozita disi më komode. Kampionati i sivjetëm ka qenë shumë i vështirë sepse nga kategoria sivjet bien plot 6 ekipe ngaqë kampionati i ardhshëm do jetë me 10 skuadra. Kemi një kalendar të favorshëm në javët e mbetura dhe me shumë mundësi Lokarno nuk e diskuton qëndrimin në kategori"-ka thënë ai.

Një javë më parë Liria e Prizrenit ndali Prishtinën e vendit të parë duke e mundur me rezultatin 1-0, pikërisht me golin e shkodranit Adi Mehja. Por sot ajo ka mundur edhe Trepçe '89, skuadrën e vendit të dytë. Madje me rezultat edhe më të thellë, 2-0. Siç bën të ditur faqja zyrtare e klubit prizrenas, dy shkodranët kanë qenë sërish ndër më të mirët në fushë ndonëse këtë herë nuk kanë shënuar. Tafili ka qenë protagonist tek goli i parë teksa ka dhënë asistin për Ramën, që e ka dërguar topin në rrjetë. Nga ana tjetër, Mehja në pjesën e dytë ka arritur të godasë traversën por pa shënuar dot. Të dy këta futbollistë kanë qenë në fushë për 90 minuta në këtë takim.

Në Shkodër dhe në Shqipëri e njohin pëmes xhonglimeve dhe you-tubit por mesfushori Xhuliano Kulli di të luajë bukur futboll. Pikërisht për këtë arsye, dy ditë më parë, 21 vjeçari i lindur në Shkodër dhe i rritur në Itali, ka firmosur një kontratë dyvjeçare me skuadrën e mirënjohur rumune të Dinamos së Bukureshtit. Videot e tij në you-tube, kanë ngacmuar drejtuesit e Dinamos së Bukureshtit për të dërguar menaxherët e tyre në Itali për ta ndjekur në disa ndeshje dhe janë befasuar me nivelin e paraqitur. Për këtë arsye ata i kanë ofruar të shkojë në Rumani për të vazhduar karrierën e tij sportive. Dy ditë më parë, Xhuliano Kulli siç bëhet e ditur edhe nga mediat rumune, ka firmosur për dy vite me gjigandët rumunë të futbollit por kontrata ka një klauzolë sepse deri në fund të këtij sezoni, lojtari duhet të stërvitet dhe të luajë me ekipin e kategorisë së dytë të Rumanisë- Deva që është një filial i Dinamos së Bukureshtit.

Futbollisti shkodran Armando Vajushi ka luajtur sërish titullar në ndeshjen e luajtur pasditen e sotme ndaj Varnas. Ai ka qëndruar 45 minuta në fushë ndërkohë që me fillimin e pjesës së dytë është zëvendësuar nga ana e trajnerit Stoçkov. Skuadra e Vajushit e ka fituar ndeshjen e sotme me rezultatin 1-0 ndonëse ka luajtur në transfertë. Goli i Janes në minutën e 55-të i ka dhënë fitoren kësaj skuadre.Duhet thënë se Liteksi ka ndryshuar tërësisht pas janarit teksa ka arritur 6 fitore dhe 1 barazim ndërkohë që nuk e njeh shijen e humbjes. Me fitoren e sotme, kjo skuadër është ngjitur në vendin e pestë të renditjes vetëm me 4 pikë larg vendit të dytë dhe të tretë. Madje kjo diferencë mund të ngushtohet javën e ardhshme teksa Liteks do presë në Lovech ekipin e Levskit të Sofjes që është i renditur i dyti. Për Vajushin sigurisht që ka rëndësi të luajë rregullisht dhe të japë më të mirën e tij.

Futbollisti shkodran Admir Mehaj ka shënuar sërish për skuadrën e Lirisë së Prizrenit për të cilën luan. Ka ndodhur kështu në takimin e sotëm, atë që skuadra prizrenase ka luajtur në fushën e vet ndaj ekipit të Prishtinës që udhëheq kampionatin. Mehaj ka shënuar në minutën e 47-të të ndeshjes me një gjuajtje të fortë me të djathtën e tij nga 25 metra. Ky gol ka qenë i vetmi i ndeshjes, rezultati përfundimtar i së cilës ka qenë 1-0 për Lirinë. Ky është goli i dytë rradhazi për Mehajn sepse siç ju kemi bërë të njohur, ai pat shënuar edhe javën e kaluar, në transfertën e mbyllur barazim 1-1 me KEK. Ndeshja e sotme ndaj Prishtinës ka qenë interesante dhe është ndjekur nga 2 mijë shikues. Figurë shumë të mirë në këtë ndeshje ka bërë edhe futbollisti tjetër shkodran Alsid Tafili.

Pas Alsid Tafilit, një tjetër futbollist shkodran bëhet protagonist për skuadrën kosovare të Lirisë së Prizrenit. Bëhet fjalë për mesfushorin Admir Mehja. Ai ka shënuar golin e vetëm për skuadrën e tij në ndeshjen e fundit të kampionatit, atë të luajtur në transfertë ndaj KEK-ut. Goli i tij në minutën e 69-të i dha epërsinë momentale prizrenasve por ata nuk mund ta ruajnë atë deri në fund sepse vendasit barazuan rezultatin katër minuta para mbarimit të ndeshjes. Megjithatë  barazimi në fushën kundërshtare nuk është keq për Lirinë që e ka nisur fazën e dytë më mirë.

Skuadra kosovare e Lirisë së Prizrenit ka humbur në fushën e saj nga ekipit kryesues të Ligës së parë të Kosovës- Ferronikelit dhe është eliminuar nga kupa. Ka ndodhur kështu në turin çerekfinal që është luajtur vetëm me një takim në Prizren. Miqtë kanë fituar 2-1 duke qenë ata tashmë në gjysmëfinale të këtij kompeticioni. Golin e vetëm për Lirinë e ka shënuar mesfushori shkodran Alsid Tafili nga pika e 11-metërshit në minutën e 66-të duke ngushtuar rezultatin por pa mundur dot të barazojë. Në fakt, skuadra prizrenase e ka më shumë mendjen tek kampionati ku kërkon të ngjitet sa më shumë në renditje.

Futbollisti shkodran Armando Vajushi sot ka luajtur 90 minuta të plotë si titullar në formacionin e Liteks në ndeshjen e kampionatit që kjo skuadër ka zhvilluar në transfertë nga Beroe skuadrës së Beroes. Kjo ndeshje është mbyllur në barazim 1-1. Nga sa bëhet e ditur në faqen zyrtare të klubit bullgar pdlitex.com, 20 vjeçari shkodran ka bërë një paraqitje të mirë në këtë takim, duke qenë në dy-tre raste shumë pranë shënimit të golit. Takimi është ndjekur nga 6 mijë tifozë dhe me këtë barazim rregjistrohet një tjetër rezultat pozitiv për Liteksin i cili duhet pranuar se në fazën e dytë të kampionatit është i tjetërsuar pas ardhjes në krye të tij të trajnerit Stoiçkov dhe disa futbollistëve ndër të cilët edhe Vajushi.

Sulmuesi 20 vjeçar shkodran Armando Vajushi sot më në fund ka luajtur si titullar në formacionin e skuadrës Liteks Lovech.Ai ka qenë në fushë deri në minutën e 57-të kur trajneri ka vendosur ta largojë nga fusha ngaqë sulmuesi kryesor i kësaj skuadre, braziliani Nikasio në fillimin e pjesës së dytë është ndëshkuar me karton të kuq prandaj dhe trajneri ka vendosur të largojë Vajushin për të futur në lojë një mesfushor të mirëfilltë. E gjithë ndeshja është fituar nga Liteksi me rezultatin 1-0 me gol të brazilianit Nikasio që në pjesën e parë.Liteksi i këtij viti është shumë më ndryshe nga ai që ka qenë deri në dhjetor. Ardhja e trajnerit Stoiçkov, e Vajushit dhe e disa futbollistëve të tjerë në merkaton e janarit, ka ndryshuar shumë gjëra.

Armando Vajushi pritet që ditën e nesërme të jetë që nga minuta e parë në fushën e lojës me skudrën e tij Litex në Bullgari. Shkodrani dhe ekipi i tij ka një përballje të vështirë. Edhe pse luajnë brenda nuk e konsiderojnë aspak të lehtë sfidën me Slavia të Sofies. Këtë javë kanë një kundërshtar të fortë përballë. Vajushi pritet ta nisë në formacionin e parë. Ish sulmuesi i Vllaznisë ka shfaqur formë të mirë sportive dhe është përzgjedhur nga trajneri Stoichkov për ta nisur lojën me 11-shen e parë. Shkodrani e ka mirëpritur këtë përzgjedhje të trajnerit të tij duke i shprehur se do të jetë në tapetin e blertë për të bërë më të mirën e tij. "Akoma nuk është vendosur përfundimisht por me shumë gjasa do ta nis ndeshjen ndaj Slavia si titullarë. Natyrisht që një fakt i tillë më gëzon" - deklaron Vajushi nga Bullgaria. Deri tani ka provuar të luaj në tre ndeshje zyrtare me Litex teksa është aktivizuar me nga 30 minuta në secilën prej ndeshjeve. Ka marrë pëlqimin e tifozëve dhe stafit teknik. Ka zhvilluar lojë të mirë dhe ka qenë edhe produktiv teksa ka dhënë një asist që është shndërruar në gol duke shfaqur menjëherë aftësitë e tij.