Nga Endri ÇINARI
Nëse ka një skuadër apo klub në vendin tonë që gjithmonë i ka kushtuar vëmendje elementit të ri, ajo është Vllaznia. Shkodranët ndër vite kanë prodhuar talente, të cilët i kanë promovuar dhe shndërruar në futbollistë të rëndësishëm për kampionatin apo edhe kombëtaren e Shqipërisë.
Ku në sezonet e fundit janë pikërisht emra si: Alivoda, Dodaj apo Jukaj të cilët të ardhur rishtazi nga ekipet zinxhirë, “shkëlqyen” me skuadrën e parë duke u shndërruar në protagonistë. Madje me dy të parët të cilët janë transferuar edhe në kampionate jashtë vendit, me kuqeblutë që kanë përfituar shifra të majme nga shitja e dy futbollistëve.
Edhe këtë edicion duket se mbështetja ndaj elementit të ri nuk do mungojë aspak dhe disa prej tyre i dhanë “sinjalet” në miqësoren të fituar 3-0 ndaj Vllaznia B. Emra si Kubazi apo Ara gjetën golat në duelin ndaj ekipi të dytë kuqeblu, duke treguar për cilësitë, por edhe “urinë” e tyre për të pasur minuta dhe qenë protagonistë në sezonin 2025-26 për kuqeblutë.
Gjithashtu edhe Tafili ka pasur minutat e tij deri në këtë pikë të sezonit, madje duke dhënë performanca të kënaqshme. Patjetër konkurenca do jetë shumë e fortë për futbollistët e rinj, duke parë edhe faktin se Vllaznia ka formuar një ekip me shumë emra të njohur dhe plot eksperiencë. Megjithatë kjo duket se nuk ul aspak vëmendjen e drejtuesve apo edhe stafit teknik ndaj elementit të ri dhe të prespektivës.
Ku gjatë sezonit të gjithë do kenë mundësinë për të treguar vlerat e tyre. E prandaj të gjithë futbollistët duhet të jenë të gatshëm të “kapin” shansin e tyre në një skuadër të mbushur me “yje” sidomos në mesfushë dhe sulm.(www.shkodrasport.com)
