Partizani u eliminua me polemika nga Kupa e Shqipërisë, pasi AF Elbasani fitoi 3-1 në shtesë për të avancuar në gjysmëfinale. 11-metërshi i dhënë në favor të Elbasanit shkaktoi reagimin e fortë te Partizani, që shpalli arbitrin Eldorjan Hamiti “non grata” dhe i kërkoi FSHF-së përjashtimin e tij.
“Klubi Partizani dënon me forcë gjykimin e ndeshjes të Kupës së Shqipërisë Partizani – Elbasani, me një arbiter të papërgjegjshëm si Eldorjan Hamiti. Ky arbitër është non grata për Partizanin. Rasti më flagrant është minuta 119, kur Hamiti vendosi kualifikimin me një penallti inekzistente, të cilën vetëm ai e ka parë.
Çdokush mund të gjykojë vetë nga këto pamje të cilat nuk kanë nevojë për koment. Jemi thellësisht të hidhëruar për vjedhjen që i bëhet djersës së lojtarëve dhe dëmin që i bëhet ekipit.
I bëjmë thirrje Federatës Shqiptare të Futbollit për përjashtimin e këtyre arbitrave të papërgjegjshëm nga sistemi i arbitrimit, që bashkë me imazhin e Partizanit po dëmtojnë imazhin e futbollit dhe vetë Institucionin më të lartë të Futbollit në vend, duke rritur pakënaqësinë e sportdashësve përkundrejt besueshmërisë së garës sportive. FK Partizani kërkon vetëm drejtësi!”, thuhet në reagimin e klubit.
