Shkruar nga Endri ÇINARI
Kryendeshja e javës së 28-të në Superiore pritet të dhurojë emocione të mëdha, teksa Vllaznia dhe Egnatia përballen këtë të premte në një duel që vlen shumë për kreun e kampionatit. Sfida mes shkodranëve dhe rrogozhinasve shihet si një nga momentet kyçe të sezonit, pasi të dy skuadrat synojnë të konsolidojnë pozitat në garën për titull. Në prag të këtij takimi kaq të rëndësishëm, trajneri Martini duket se po përgatit me kujdes çdo detaj, duke kërkuar maksimumin nga skuadra e tij.
Nga sa është parë në seancat stërvitore të ditëve të fundit, tekniku kuqeblu ka nisur të skicojë edhe formacionin e mundshëm që do të hedhë në fushë për këtë përballje. Në portë pritet të jetë Pohls, i cili mbetet një pikë e rëndësishme sigurie për prapavijën e Vllaznisë dhe pritet të ketë një rol vendimtar përballë sulmit të rrezikshëm të Egnatias.
Në repartin defensiv, stafi teknik duket se ka ide të qarta për rreshtimin. Gjini, Çelikoviç dhe Bajrami pritet të formojnë bërthamën e mbrojtjes, duke u besuar detyra të rëndësishme për të ndalur ofensivën e rrogozhinasve. Megjithatë, i vetmi dyshim për momentin mbetet Gurishta, i cili po vlerësohet nga stafi mjekësor për të parë nëse do të jetë në gjendjen optimale fizike për të zbritur në fushë nga minuta e parë.
Në mesfushë duket se nuk ka shumë dilema. Qato, Krymi dhe Kallaku pritet të jenë titullarë dhe të mbajnë peshën e organizimit të lojës. Ata do të mbështeten nga krahët, ku në të djathtë pritet të aktivizohet Kastrati, ndërsa në të majtë Jago, dy futbollistë që pritet të japin shpejtësi dhe dinamizëm në fazën sulmuese të kuqebluve.
Sa i përket repartit ofensiv, Vllaznia pritet të mbështetet te përvoja dhe instinkti i golit të Balajt. Sulmuesi do të ketë në krah Malën, i cili pritet të lëvizë shumë në zonën kundërshtare dhe të krijojë hapësira për partnerin e tij në sulm. Me një përbërje të tillë dhe me motivimin maksimal për një duel që mund të ndikojë drejtpërdrejt në garën për titull, shkodranët synojnë të bëjnë një tjetër hap të rëndësishëm në kampionat.
Burimi: Gazeta “Shkodra Sport”
