Hetimi mbi arbitrimin në futbollin italian po zgjerohet dita-ditës, duke nxjerrë në pah detaje dhe prapaskena që po tronditin botën e futbollit. Sipas mediave, brenda sistemit të arbitrave janë shfaqur tensione të forta mes disa figurave kyçe, të cilat aktualisht ndodhen edhe nën hetim.
Në qendër të zhvillimeve janë Andrea Gervasoni, mbikëqyrës i VAR-it, dhe arbitri Luigi Nasca. Mes tyre raportohet se kanë ndodhur përplasje të ashpra, madje thuhet se kanë qenë pranë një konflikti fizik pas ndeshjes Inter–Verona në janar 2024. Në atë rast, një ndërhyrje me bërryl nga Bastoni ndaj Duda nuk u rishikua nga VAR-i dhe episodi nuk solli ndërhyrje nga sistemi.
Një tjetër episod lidhet me ndeshjen Salernitana–Modena në mars 2025, ku dyshohet se Gervasoni ka ushtruar presion mbi Nasca dhe arbitrin kryesor për një rishikim në VAR, në lidhje me një penallti të paakorduar.
Nga dosjet hetimore përmenden gjithashtu tensione të brendshme në Shoqatën Italiane të Gjyqtarëve, si dhe pretendime për të ashtuquajturin “sistem Rocchi”. Sipas këtyre dyshimeve, bëhet fjalë për një mekanizëm caktimesh ndeshjesh që mund të ketë favorizuar disa arbitra dhe të ketë ndikuar në karrierën e tyre.
Mes rasteve të përmendura nga hetuesit janë edhe ndeshje të rëndësishme të Serie A si Bologna–Inter, e drejtuar nga arbitri Colombo, dhe Inter–Milan, e gjykuar nga Doveri, për të cilat pretendohet se ka pasur caktime të orientuara.
Sipas këtyre dyshimeve, Colombo konsiderohej më i favorizuar në disa ndeshje që lidhen me Interin, ndërsa Doveri jo. Hetimi mbetet ende në zhvillim dhe pritet të vijojë edhe në muajt e ardhshëm. Nëse konfirmohen shkelje, pasojat mund të shtrihen edhe në aspektin e drejtësisë sportive për sezonet e ardhshme.
