Kupa e Botës 2026 po shënon një kapitull të ri në komercializimin e futbollit, ku tani edhe emri juaj mund të jetë pjesë e spektaklit, për sa kohë keni buxhetin e duhur. FIFA ka prezantuar paketa të pazakonta që lejojnë tifozët të “futen” në stadiume përmes shpenzimeve direkte.
Për 79 dollarë, emri juaj (me kufizim deri në 30 karaktere) mund të shfaqet në ekranet gjigante të stadiumeve gjatë ndeshjeve. Për ata që kërkojnë përvojën përfundimtare, FIFA ofron një mundësi ekskluzive për 160 dollarë: vendosjen e emrit tuaj në qilimin ceremonial, mbi të cilin lojtarët do të ecin pak çaste para finales së madhe.
Kjo qasje po shkakton debat mes tifozëve. Ndërsa disa e shohin si një mundësi unike për t’u bërë pjesë e historisë, të tjerë kritikojnë shndërrimin e çdo detaji të turneut në një mjet fitimi. Një gjë është e sigurt: në vitin 2026, pasioni për futbollin ka një çmim zyrtar. /Sport Ekspres/
