Shkruar nga Endri ÇINARI
Kategoria e Dytë do të ngrejë siparin këtë fundjavë, me një edicion që pritet të sjellë jo pak rivalitet dhe përballje interesante në fushën e lojës. Në Grupin A, ku garojnë 12 ekipe, vëmendje të veçantë merr përfaqësimi i qarkut Shkodër, që këtë sezon vjen me plot pesë skuadra. Basania, Vllaznia B, Tërbuni, Shiroka dhe Veleçiku do të synojnë të bëjnë një paraqitje sa më dinjitoze, ndërsa secila prej tyre ka objektivat dhe ambiciet e veta.
E para që do të zbresë në fushë do të jetë Vllaznia B, që ditën e shtunë do të përballet me Tërbunin në një derbi që pritet të ketë interes të veçantë. Dy skuadrat do ta nisin sezonin përballë njëra-tjetrës, në një sfidë ku përtej pikëve në lojë, pritet të ndikojë edhe rivaliteti lokal. Të dyja palët do të kërkojnë ta nisin kampionatin me këmbën e mbarë.
Po të shtunën, në transfertë do të luajë edhe Shiroka. Skuadra e drejtuar me ambicie për këtë sezon do të udhëtojë për t’u përballur me Erzenin, në një sfidë që pritet të jetë një test i rëndësishëm që në javën e parë. Shiroka synon të tregojë që në start se është gati për një kampionat konkurrues dhe se objektivat e saj nuk janë thjesht pjesëmarrëse.
Në transfertë do të jetë edhe Veleçiku, që do të vizitojë Lushnjen. Një tjetër përballje që do t’i japë mundësinë skuadrës koplikase të masë forcën e saj në një sezon ku rivaliteti pritet të jetë i fortë. Veleçiku do të kërkojë të rikthehet me pikë nga kjo transfertë dhe ta nisë në mënyrën më të mirë aventurën e re.
Ndërkohë, Basania do ta zhvillojë ndeshjen e saj ditën e dielë, duke pritur Eagles. Ky takim ishte parashikuar fillimisht për një ditë më herët, por është shtyrë me 24 orë dhe do të luhet të dielën. Për Basanian bëhet fjalë për një mundësi të mirë për të nisur sezonin në shtëpi me një rezultat pozitiv dhe për t’i dhënë menjëherë një sinjal rivalëve.
Në tërësi, Kategoria e Dytë pritet të dhurojë një kampionat interesant këtë edicion, me më shumë rivalitet dhe beteja të forta në fushën e lojës. Pesë ekipet e qarkut Shkodër do të jenë pjesë e këtij rivaliteti dhe secila do të kërkojë të shkruajë historinë e saj gjatë sezonit. Starti i fundjavës do të jetë vetëm kapitulli i parë i një kampionati që premton shumë emocione.
Burimi: Gazeta “SHKODRA SPORT”
