Shkruar nga Endri ÇINARI
Vllaznia po përgatitet për përballjen me Laçin, teksa në kampin kuqeblu priten edhe disa ndryshime të mundshme në formacionin titullar. Pas tri javëve të para të kampionatit, stafi teknik po vlerëson alternativat për të gjetur skuadrën më të përshtatshme për sfidën e radhës, me disa pozicione që mbeten ende në diskutim.
Dilema kryesore duket se është në portë. Performanca e Avramit në këtë start të sezonit nuk ka qenë në nivelin e pritshmërive dhe për këtë arsye ndoshta ekziston mundësia që Jukaj të marrë një tjetër shans nga minuta e parë. Megjithatë, vendimi përfundimtar pritet të merret në momentet e fundit, pasi trajneri Edi Martini do të vlerësojë gjendjen dhe paraqitjen e të dy portierëve.
Në repartin e mbrojtjes, për momentin nuk priten ndryshime të mëdha. Pavarësisht luhatjeve që janë shfaqur në ndeshjet e para, Martini duket se do t’u besojë sërish të njëjtëve futbollistë, duke kërkuar më shumë stabilitet dhe përqendrim në prapavijë. Sfida me Laçin shihet edhe si një mundësi për të korrigjuar gabimet e javëve të para.
Një ndryshim i mundshëm mund të vijë në mesfushë, ku Qato është kandidat i fortë për të nisur nga minuta e parë. Ai pritet të lëvizë në formacion mes Mehmetit dhe Drosit, në varësi të skemës dhe roleve që Martini do t’u japë lojtarëve në këtë takim. Konkurrenca në këtë repart është një tjetër pikë ku trajneri duhet të bëjë zgjedhjen e duhur.
Në sulm, ndërkohë, nuk priten ndryshime në formacionin bazë. Megjithatë, një emër që ka dhënë shenja pozitive është Tounkara, i cili po kërkon më shumë hapësira dhe mund të marrë minuta të konsiderueshme ndaj kurbinasve. Performanca e tij në stërvitje dhe nevojat e ndeshjes mund ta bëjnë një alternativë të rëndësishme gjatë takimit.
Në këtë mënyrë, Vllaznia pritet të ruajë pjesën më të madhe të formacionit, ndërsa dilemat kryesore mbeten në portë dhe në mesfushë. Sfida me Laçin vjen në një moment kur kuqeblutë kërkojnë fitoren e parë të sezonit dhe për këtë arsye Martini duhet të bëjë zgjedhjet që do t’i japin skuadrës më shumë siguri, ekuilibër dhe forcë për të marrë tri pikët.
Burimi: Gazeta “SHKODRA SPORT”
