Shkruar nga Endri ÇINARI
Seralb Hotaj po shndërrohet në një nga protagonistët kryesorë të Vllaznisë B në këtë fillim sezoni. Sulmuesi 19-vjeçar ishte sërish vendimtar për skuadrën e drejtuar nga Brikeno Bizi, duke kontribuar në fitoren minimale 0-1 në transfertën ndaj Lushnjës kryesuese. Një sukses me vlera të veçanta për shkodranët, të cilët tashmë kanë marrë kryesimin e vetëm të kampionatit, me pikë të plota pas katër javëve të para.
Në një skuadër që po tregon vazhdimësi dhe ambicie në këtë edicion, Hotaj po dëshmon se mund të jetë një prej armëve më të rëndësishme në repartin ofensiv. Pas golit të shënuar në përballjen me Erzenin, 19-vjeçari ka gjetur sërish rrugën e rrjetës ndaj Lushnjës, duke konfirmuar momentin pozitiv që po kalon dhe rëndësinë e tij në rezultatet e fundit të ekipit kuqeblu.
Megjithatë, kontributi i sulmuesit nuk kufizohet vetëm te golat. Në sfidën ndaj shijakasve, Hotaj ishte protagonist edhe me dy asiste për gol, duke treguar se përveç instinktit për të finalizuar, zotëron edhe aftësinë për të krijuar raste dhe për të vënë në lëvizje shokët e skuadrës. Një profil ofensiv që i jep më shumë alternativa Vllaznisë B dhe e bën 19-vjeçarin një element të rëndësishëm në mekanizmat e lojës së Brikeno Bizit.
Në fakt, sinjalet e para pozitive kishin ardhur që në javën hapëse të kampionatit, kur Hotaj kishte shënuar ndaj Veleçikut, por goli i tij ishte anuluar për pozicion jashtë loje. Që prej asaj ndeshjeje, sulmuesi ka vijuar të tregojë potencialin e tij, duke u bërë gjithnjë e më i pranishëm në momentet vendimtare të skuadrës.
Përtej statistikave, ajo që bie në sy te Hotaj është vazhdimësia që po arrin të ndërtojë në këtë fazë të sezonit. Në moshën 19-vjeçare, të qenët protagonist në një ekip që synon objektiva të rëndësishëm përbën një mundësi të mirë për të fituar përvojë dhe për të hedhur hapa përpara në zhvillimin e tij si futbollist. Performancat e fundit tregojnë se ai po shfrytëzon minutat dhe hapësirën e krijuar për të dhënë kontributin e tij.
Me Vllazninë B që tashmë kryeson e vetme pas katër javësh, paraqitjet e Hotajt mund të tërheqin vëmendjen edhe përtej ekipit të dytë. Nëse sulmuesi vijon me të njëjtin ritëm, nuk përjashtohet mundësia që ai të jetë në vëzhgimin e stafit të ekipit të parë të Vllaznisë. Për momentin, objektivi i tij mbetet të vazhdojë të jetë vendimtar me kuqeblutë, ndërsa golat dhe asistet e fundit po e kthejnë në një emër për t’u ndjekur me interes.
Burimi: Gazeta “Shkodra Sport”
