Kanë mbetur edhe tri ndeshje deri në fund të sezonit në Superligë, të cilat për Kamzën përkthehen në tri finale për mbijetesë.
Pas barazimit 0-0 në Shkodër kundër Vllaznisë, Kamza ruajti diferencën me +2 pikë më shumë se kuqeblutë në renditje.
Në një intervistë për “Vipsport.al”, mbrojtësi i djathtë i Kamzës, Erlis Frashëri shprehet se në Shkodër, ekipi ku ai bën pjesë tregoi se di të luajë futboll, të luftojë dhe të marrë rezultatin e kërkuar.
Gjithashtu, Frashëri është i bindur te forca e Kamzës duke deklaruar se nuk do ta diskutojë mbijetesën në Superligë.
-Një pikë e çmuar kundër Vllaznisë. A ka hedhur Kamza një hap të rëndësishëm drejt mbijetesës?
-Kamza nuk e mendon rënien nga kategoria. Me Vllazninë treguam që dimë të luajmë futboll. Çdo ndeshje e jona është si një finale.
-Sa ju motivoi letra e presidentit Qarri para ndeshjes?
-Normal që ndikoi për mirë. Na dha më shumë forcë dhe atë e shprehëm në fushë?
-Skënderbeu duket se ka në dorë fatin e luftës për mbijetesë, sepse luan kundër Teutës dhe Vllaznisë gjithashtu. Mendoni se Skënderbeu, tani që është i pamotivuar mund të lehtësojë misionin e dy rivaleve të Kamzës?
– Nuk besoj se Skënderbeu mund të tolerojë ndeshjen me Teutën dhe me Vllazninë.
Skënderbeu do tregojë që është kampion i vërtet. Sa i përket fatit, e kemi në këmbët tona dhe nuk na interesojnë se çfarë bëjnë kundërshtarët.
-I druheni gjykimit duke parë se shpesh edhe klubi është ankuar dhe sa mund të ndikojë ky fenomen edhe në luftën për mbijetesë?
– Nuk besoj të ndikojë. Ne do japim maksimumin që të arrijmë qëndrimin në Superligë. I kemi të gjitha mundësitë dhe kualitetet.
-Cila është pika më e fortë e Kamzës?
– Sigurisht që është grupi. E kemi treguar në këto ndeshjet e fundit këtë gjë. Kemi treguar karakter të fortë dhe shumë grintë.
-Çfarë ka sjellë në skuadër trajneri Ahmataj, sepse pas ardhjes së tij ekipi ka nisur të funksionojë sërish?
– Trajneri Ahmataj ka futur një frymë të re në ekip. Skuadra po i përgjigjet me përpikëri skemave, plus që është edhe djalë i ri, i cili ka pak vite që ka lënë futbollin. Di t’i zgjidhë këto ndeshje si finale.
-Si e shihni ndeshjen e radhës ndaj Flamurtarit?
– E thashë edhe pak më lart që çdo ndeshje e jona është finale dhe besoj shumë që do marrim tri pikët edhe ndaj Flamurtarit.
-Në aspektin personal si ka qenë ky sezon për ju?
– Jam munduar të jap maksimumin në çdo ndeshje. Nuk flas dot për veten, sepse janë të tjerë që gjykojnë se si kam qenë në këtë sezon./vipsport/
