Shkruar nga Endri ÇINARI
Vllaznia ka gjetur më në fund një nga elementët që i kishte munguar në këtë fillimsezoni: sigurinë në prapavijë. Në javën e gjashtë të kampionatit, kuqeblutë arritën të mbajnë për herë të parë portën e paprekur, duke i dhënë fund një serie prej pesë ndeshjesh radhazi me gola të pësuar.
Fitorja minimale 1-0 përballë Dinamos kishte një rëndësi të veçantë për skuadrën shkodrane. Përveç tri pikëve të para dhe suksesit të parë në edicionin 2026-2027, Vllaznia regjistroi edhe ndeshjen e parë pa pësuar gol. Një tregues pozitiv për një ekip që deri në këtë pikë të sezonit kishte hasur vështirësi për të ruajtur ekuilibrat në lojën mbrojtëse.
Në pesë javët e para, Shkodranët kishin pësuar gola ndaj Skënderbeut, Elbasanit, Partizanit, Laçit dhe Teutës. Kjo problematikë kishte ndikuar edhe në rezultatet e skuadrës, e cila nuk kishte arritur të gjente rrugën drejt fitores. Përballë Dinamos, megjithatë, tabloja ishte ndryshe, me kuqeblutë që treguan më shumë kujdes dhe përqendrim në fazën mbrojtëse.
Ajo që e bën edhe më domethënëse këtë paraqitje është fakti se Vllaznia luajti me një prapavijë thuajse të improvizuar. Në qendër u vendosën Musta dhe Gurishta, ndërsa në krahë luajtën Bardhi dhe Avduli. Nga këta katër futbollistë, vetëm Avduli ishte në pozicionin e tij natyral, por kjo nuk e pengoi skuadrën të gjente stabilitetin e kërkuar.
Përtej emrave dhe pozicioneve, ajo që ra në sy ishte përqendrimi i lartë i skuadrës në prapavijë. Vllaznia arriti të kufizonte hapësirat dhe të shmangte thuajse çdo rrezik serioz nga ana e Dinamos, duke administruar me kujdes avantazhin e krijuar. Një sjellje ndryshe nga ajo e javëve të kaluara, kur skuadra kishte vuajtur për të ruajtur ekuilibrat deri në fund të ndeshjeve.
Tashmë, sfida për kuqeblutë është që kjo paraqitje të mos mbetet një episod i izoluar, por të shërbejë si pikënisje për vazhdimësinë. Fitorja e parë dhe porta e paprekur janë dy sinjale inkurajuese në një periudhë të vështirë për skuadrën shkodrane. Vllaznia ka ende shumë për të përmirësuar, por suksesi ndaj Dinamos mund t’i japë besimin e nevojshëm për të dalë gradualisht nga kriza e rezultateve.
Burimi: Gazeta “SHKODRA SPORT”
