Shkruar nga Endri ÇINARI
Përballë një situate aspak të qartë në prag të javës së gjashtë të Superiores, Vllaznia vijon përgatitjet për duelin ndaj Dinamos. Problematikat e ditëve të fundit, të shoqëruara edhe me bojkotin e stërvitjeve nga futbollistët, e kanë vendosur trajnerin Csaba Laszlo përballë një situate të vështirë, ku edhe ndërtimi i formacionit mbetet ende me pikëpyetje.
Megjithatë, nga seancat stërvitore që tekniku hungarez ka zhvilluar gjatë kësaj jave, janë krijuar disa ide më të qarta për 11-shen që mund të zbresë nga minuta e parë. Në portë, gjithçka duket se po shkon drejt Aron Jukajt, i cili pritet të jetë mes shtyllave për këtë përballje të rëndësishme.
Në repartin e mbrojtjes, Laszlo duket se ka krijuar një ide më të konsoliduar. Dyshja Pusi-Dumfur pritet të jetë në qendër, ndërsa Erdenis Gurishta do të vendoset në krahun e djathtë dhe Musta në të majtin. Një linjë që synon të sjellë më shumë siguri pas 10 golave të pësuar në pesë javët e para.
Edhe në mesfushë ka disa emra që duket se kanë fituar avantazhin për të nisur nga minuta e parë. Mehmeti, Qato dhe Murataj janë tre lojtarët më të avantazhuar për të formuar repartin qendror, ndërsa dyshimet kryesore të trajnerit mbeten në krahët e sulmit.
Pikërisht aty pritet të zhvillohet edhe balotazhi i fundit. Në njërin krah, Uldedaj dhe Bizi janë në garë për një vend titullari, ndërsa në krahun tjetër Bardhi dhe Ara kërkojnë besimin e Laszlos. Në majën e sulmit, eksperienca e Bekim Balajt pritet të jetë pika e referimit për kuqeblutë
Burimi: Gazeta “Shkodra Sport”
