Shkruar nga Endri ÇINARI
Vllaznia duket se po e ndjek me vëmendje ecurinë e ekipit B, i cili e ka nisur në mënyrën më të mirë të mundshme kampionatin në Kategorinë e Dytë. Kuqeblutë e drejtuar nga Brikeno Bizi kanë marrë 6 pikë në dy javët e para, duke u vendosur në krye të renditjes dhe duke dhënë sinjale pozitive jo vetëm sa i përket rezultateve, por edhe mënyrës se si po zhvillohet loja.
Dy fitore në po kaq ndeshje e kanë vendosur Vllazninë B në një pozicion të mirë që në start, por ajo që ka tërhequr vëmendjen është paraqitja e ekipit në fushën e lojës. Grupi i drejtuar nga Bizi ka treguar organizim, ritëm dhe një mënyrë loje që lë hapësirë për optimizëm. Kjo ecuri pritet të ndiqet nga afër edhe nga drejtuesit e klubit, pasi ekipi B mbetet një prej burimeve kryesore për të evidentuar dhe zhvilluar elementët e rinj.
Në këtë fillim sezoni, disa futbollistë kanë spikatur më shumë se të tjerët, duke tërhequr vëmendjen me paraqitjet e tyre. Performanca e tyre në dy javët e para mund t’i japë stafit teknik të ekipit të parë një tjetër mundësi për të parë nga afër potencialin që ekziston në grupmoshat dhe skuadrën B. Një afrim në stërvitje me ekipin e parë do të ishte edhe një mënyrë për të provuar nëse këta lojtarë janë gati për një nivel më të lartë.
Momenti është gjithashtu interesant për shkak të situatës te skuadra e parë. Disa prej futbollistëve që nisën sezonin me pritshmëri të konsiderueshme nuk kanë dhënë deri tani atë që pritej prej tyre, duke krijuar hapësirë për alternativa të tjera brenda klubit. Në këtë kontekst, dera mund të jetë e hapur edhe për elementët e ekipit B që po tregojnë formë dhe vazhdimësi.
Megjithatë, kalimi nga Kategoria e Dytë në ekipin e parë nuk është një hap automatik dhe dy javë kampionat nuk janë të mjaftueshme për të nxjerrë përfundime. Por paraqitjet e mira janë një sinjal pozitiv dhe një arsye për t’i dhënë mundësi disa prej këtyre lojtarëve që të testohen në një nivel më të lartë. Stërvitjet me ekipin e parë dhe, pse jo, grumbullimet në ndeshje, mund të tregojnë më qartë se cilët prej tyre janë gati për këtë hap.
Për Vllazninë, një situatë e tillë mund të jetë një mundësi për të parë më shumë nga brenda, përpara se të kërkojë zgjidhje jashtë grupit. Ekipi B po jep rezultatet e para dhe po prodhon lojë cilësore, ndërsa tani mbetet për t’u parë nëse ndonjë prej elementëve që po spikasin do të arrijë të bindë edhe stafin e ekipit të parë se mund të jetë një alternativë reale për vazhdimin e sezonit.
