Shkruar Nga Maringlen ZHIVANI
Gazeta “Shkodra Sport” ka mësuar ekskluzivisht kundërshtarët që do të ketë Vllaznia gjatë fazës përgatitore që do të zhvillojë në Slloveni në prag të ndeshjeve të Kupave të Europës. Kuqeblutë kanë planifikuar një seri ndeshjesh miqësore me ekipe të njohura nga Kroacia, Sllovenia dhe Rumania, në atë që pritet të jetë një test i rëndësishëm për skuadrën e drejtuar nga stafi teknik, me në krye trajnerin Edi Martini.
Sipas informacionit të siguruar nga “Shkodra Sport”, Vllaznia do të përballet me Lokomotiva Zagreb, Olimpija Ljubljana, Rudeš, Argeș Pitești dhe Koper. Bëhet fjalë për kundërshtarë me eksperiencë në kampionatet respektive, çka do t’i japë mundësi ekipit shkodran të masë forcat përballë niveleve të ndryshme të ekipeve.
Këto sfida do të shërbejnë jo vetëm për përgatitjen fizike dhe taktike të skuadrës, por edhe për të testuar afrimet e reja dhe alternativat që stafi teknik, me në krye trajnerin Edi Martini, ka në dispozicion për sezonin e ardhshëm. Vllaznia synon të ndërtojë një ekip konkurrues për Kupat e Europës dhe për objektivat e sezonit të ardhshëm dhe për këtë arsye është zgjedhur një program miqësoresh me rivalë cilësorë.
Tashmë mbetet të shihet se si do të paraqiten kuqeblutë në këto përballje, të cilat do të japin sinjalet e para për formën e skuadrës para nisjes së Kupave të Europës dhe garave zyrtare. Ndërkohë, gazeta “Shkodra Sport” do t’ju mbajë të informuar me çdo detaj rreth fazës përgatitore dhe ndeshjeve miqësore të Vllaznisë.
Burimi: Gazeta “SHKODRA SPORT”
