Berat Gjimshiti dhe Besiktas janë rrugë që do bashkohen shumë shpejt. Të gjitha gjasat janë që mbrojtësi shqiptar të kalojë në Turqi që tani, duke qenë se kontrata e tij me Atalantën skadon në fund të këtij sezoni dhe palët nuk janë në negociata për të rinovuar.
Besiktas ka ditë që është vënë pas 25-vjeçarit shqiptar, por italianët kërkuan 1 milionë euro për të shitur lojtarin e tyre. Klubi nga Bosfori është stepur nga ky çmim dhe ka preferuar të presë verën për ta marrë me parametër zero, ndërkohë që firmën e Gjimshitit mund ta siguronte që tani.
Të detyruar nga kjo lëvizje drejtuesit e Atalantës kanë përgjysmuar çmimin në 500 mijë euro për kartonin e mbrojtësit kuqezi, në mënyrë që të përfitojnë diçka nga largimi i tij.
Gjimshitit preferohet shumë nga trajneri i sapoardhur Senol Gunes, pasi ai mund të luajë si qendërmbrojtës, mbrojtës krahu apo edhe si shkatërrues para mbrojtjes. Detaje të reja rreth tij priten në orën në vijim./telesport/
