Deklarata e ish-ministrit të shëndetësisë, Ilir Beqajt, ka nxitur Elvis Sinën të reagojë ashpër në rrjetet sociale. Ish-futbollisti i Tiranës i bën thirrje qeverisë që mos të veprojë ashtu siç Beqja u shpreh për t’i ulur pensionet dhe pagat e administratës, në të kundërt do të duhet të përballojnë pasojat nga populli.
Sina, i cili është bashkëshorti i një prej mjekëve të njohura në kryeqytet siç duket është mjaft i përditësuar me atë që ndodh me bluzat e bardha në vendin tonë. Ai rendit një nga një të gjithë konçesionet e Beqajt, ndërsa në fund e akuzon publikisht se i ka vjedhur plot 410 milionë euro.
Sipas Sinës, nëse nuk do ishin dhënë ato konçesione në kohën e ish-ministrit, sot Shqipëria nuk do të vuante në këtë mënyrë izolimin pasi sistemi shëndetësor do të ishte më i shëndetshëm. Në fund ai e mbyll duke thënë: “Ti dhe shokët e tu keni 30 vite që e keni rrjepur këtë vend me pasuri natyrore./newsport/
POSTIMI I ELVIS SINËS:
Ilir Beqaj ka propozuar para dy ditesh uljen e pensioneve si një nga masat për të përballuar krizën ekonomike që po vjen si pasojë e izolimit të ekonomisë.
Dy fjalë për të:
Ku e gjen ti guximin të kërkosh sakrificën e pensionistëve?
Arsyeja përse u izoluam në karantinë ishte sepse sistemi ynë shëndetësor nuk e përballonte dot fluksin e të sëmurëve.
Nuk e përballonte dot sepse ti lekët e spitaleve të reja, pajisjeve shëndetësore, ilaçeve e rritjes së pagave të mjekëve dhe infermierëve i bëre kontrata konçesionare për miqtë e tu dhe shefit tënd.
Ti firmose 410 milionë USD konçesione:
•Konçesioni i check-up – 90 milionë USD
•Sterilizimi – 160 milionë USD
•Dializa – 70 milion USD
•Shërbimi laboratorik – 90 milion USD
Me këto lekë do kishim ngritur 10 spitale të reja, zgjidhur problemin e ilaçeve, dyfishuar pagat e mjekëve si edhe do dyfishonim edhe pensionet. Nuk i bëmë se ti i vodhe.
Me këto lekë ndoshta nuk do kishim fare nevojë të izoloheshim sepse sistemi do ishte i shëndetshëm.
Ti dhe të ngjashmit e tu që e kanë rrënuar buxhetin e shtetit, sot duhet të ishit në burg ose në shtëpi duke pritur vendimin e gjykatës.
Fakti që ky vend ende nuk ka një sistem drejtësie, nuk do të thotë që nuk ka as memorie.
Guxo ti apo shefi yt të prekni lekët e pensionistëve dhe do ju vijmë në shtëpi.
Të vetmit që duhet të paguajnë sot jeni ju, klasa politike dhe klientët tuaj.
Ju që e keni rrjepur për 30 vite këtë vend të bekuar me pasuri natyrore.
Dhe do paguani!
