Romelu Lukaku thuhet se është gati të ulë pagën e tij për të ndihmuar zgjatjen e qëndrimit të tij në Inter, por edhe Chelsea gjithashtu duhet të bëjë zbritje në huazimin e tij.

Qendërsulmuesi e ka bërë të qartë shumë herë se është i lumtur në Milano dhe i vjen keq që ka bërë transferimin prej 113 milionë euro në “Stamford Bridge” në verën e vitit 2021.

Ai u rikthye një vit më vonë në huazim për 8 milionë euro dhe më në fund po gjen sërish formën e tij pas një sezoni plot me probleme lëndimesh.

Duke u përgatitur për finalen e Ligës së Kampionëve kundër Manchester Cityt dhe finalen e Kupës së Italisë me Fiorentinën, Lukaku është i etur të lërë gjurmën e tij që të mund të bindë Interin që ta mbajë atë edhe për një vit.

Sipas La Gazzetta dello Sport, belgu është i përgatitur të ulë pagën e tij për të ndihmuar në arritjen e marrëveshjes, por duhet të ndodhin edhe dy situata të tjera.

Interi duhet të përfundojë në top katërshen dhe të kualifikohet në Ligën e Kampionëve, ndërsa Chelsea duhet t’u japë atyre një zbritje në koston prej 8 milionë eurosh për një huazim për një sezon. /Telegrafi/