Shkruar nga Endri ÇINARI
Epoka e Alban Xhaferit në drejtimin e Vllaznisë është shoqëruar edhe me një numër të konsiderueshëm ndryshimesh në stolin kuqeblu. Që prej vitit 2020, kur nisi kapitulli i ri i klubit nën drejtimin privat, në krye të skuadrës kanë kaluar 9 trajnerë, me Edi Martinin që është i fundit në këtë listë. Vetë klubi e lidh nisjen e kësaj periudhe me vitin 2020 dhe me Thomas Brdariç në stol.
I pari ishte pikërisht Thomas Brdariç, i cili qëndroi nga shtatori 2020 deri në mars 2022. Gjermani ishte trajneri që udhëhoqi Vllazninë drejt fitimit të Kupës së Shqipërisë në sezonin 2020-21, ndërsa skuadra e mbylli atë kampionat në vendin e dytë.
Pas largimit të Brdariç, stoli kaloi për pak kohë te Elvis Plori, nga mars 2022 deri në maj 2022. Më pas erdhi Mirel Josa, i cili drejtoi kuqeblutë nga maji 2022 deri në mars 2023, duke i dhënë klubit një tjetër trofe, Kupën e Shqipërisë 2021-22.
Në mars 2023 nisi një periudhë me ndryshime të shpeshta. Auron Miloti qëndroi nga mars 2023 deri në prill 2023, për t’ia lënë vendin maqedonasit Goce Sedloski, i cili drejtoi Vllazninë nga prilli deri në maj 2023. Më pas, në qershor 2023, në stol u ul Migen Memelli, që qëndroi deri në tetor të po atij viti.
Në tetor 2023 drejtimin e skuadrës e mori Qatip Osmani, i cili qëndroi deri në prill 2024. Pas tij erdhi rikthimi i Thomas Brdariç, këtë herë për periudhën prill 2024 – maj 2025.
Në maj 2025, radha ishte e Edi Martinit, i cili qëndroi në krye të Vllaznisë deri në shtator 2026. Me largimin e tij, kuqeblutë janë sërish në kërkim të trajnerit të radhës. Raportimet e fundit konfirmojnë mbylljen e bashkëpunimit dhe se klubi ka nisur kërkimet për pasuesin.
Kështu, brenda rreth gjashtë vitesh, stoli i Vllaznisë ka njohur nëntë emra dhe dhjetë mandate, pasi Brdariç është shfaqur në dy periudha të ndryshme. Tashmë pritet të mësohet emri i trajnerit të dhjetë, që do të ketë detyrën të nisë një tjetër kapitull në stolin kuqeblu.
Burimi: Gazeta “SHKODRA SPORT”
