Kësisoji ngaqë nuk e ka shpikë Shqipëria. Pra “shpikësja” e këtij lloj “play – off”-i është Belgjika, ajo e cila sapo e flaku tej këtë organizim dështues të Kampionatit të saj Kombëtar. Natyrisht e flaku tej së bashku me përgjysmimin e pikëve.
Atë lloj përgjysmimi pikësh që e praktikon edhe Shqipëria jonë e dashtun. Kështu që Kampionati Kombëtar i Belgjikës për 2026-27 që sapo filloi, nuk do të ketë më “play-off” dhe vetvetiu as përgjysmim pikësh. Ndërkaq, Belgjika ka shtuar edhe dy skuadra dhe janë bërë plot 18. Jo vetëm10 si Shqipëria. Dhe nuk do të ketë më “play-off”, pra. Kampionia e Belgjikës do te shpallet skuadra e cila në përfundim të dy fazave të rregullta të Kampionatit, do të jetë në krye. Dihet ndërkaq se vitet e fundit Belgjikja ka qenë kryeneçja e madhe për ta shpallë kampionen e saj mbas mbarimit të dy fazave, duke zhvilluar “play -off”-in me 4 apo 6 skuadrat e para.
Tash jo më! Përfundimisht Belgjika i rikthehet skemës së organizimit të Kampionatit të saj, si gjithë Europa. Çka ka shumë mundësi që Shqipëria të mbesë e vetmja në kontinent me këte skemë dështuese deri aty sa nuk ka ku shkon më! Siç njoftohet, në Belgjikë, për gjithë këto vite çdo përfundim i Kampionatit me “play -off” është kundërshtuar, duke ngjallur polemika të pafund. Mirëpo, ja, që edhe Belgjika në Federatën e Futbollit e në Ligën e saj Kombëtare të Futbollit, paska patur organizatorë kryefortë si Shqipëria.
Por tash e mbrapa dorëzim i plotë! Ndërkaq, është vërtet interesante se çka ka ndodhur me skuadrën e Brukselit “Royale Union Saint – Gilloise” këto pesë vitet e fundit. Në tre Kampionate të Belgjikës ajo në përfundim të dy fazave të rregullta zuri vendin e parë. Për çka duhej shpallur Kampione e Belgjikës! Dhe jo një herë, por plot tri herë! Mirëpo, Kampione shpall skuadra e “Brugge” e cila fitoi “play-off”-et, ndonëse mbas dy fazave qe renditur e treta në të tre vitet! Pikërisht edhe humbjet e tre titujve të “Royale Union Saint – Gilloise” në këto vite të fundit, ka sjellë zhdukjen e “play-off”-it belg. Është si rasti i Egnatias së Shqipërisë në Kampionatin tonë Kombëtar, këte 2025-26. E kujtoni që Egnatia u rendit e treta, madje deri me 6 e 5 pikë më pak se Vllaznia e AF Elbasani.
Mirëpo, Egnatia rrëmbeu rrufeshëm “play off”-in për vetëm nja një javë ndeshje dhe u shpall Kampione e Shqipërisë, përveç të tjerave me pikë të barabarta me AF Elbasanin. Duke “ia vjedhur” titullin Vllaznisë së Shkodrës e cila në përfundim të dy fazava të rregullta ishte fitimtare. E pra kjo do të ishte arritja më e madhe e skuadrës shkodrane mbas plot 25 vjetëve nga titulli i fundit që ka fituar (2001).Dhe siç nuk po pushojmë së përsërituri, kjo këtu do të ishte pamja e këtij titulli të futbollit të Shkodrës:
Përfundimi “i vërtetë” i Kampionatit të Shqipërisë 2025-26:
Java 36 * 10.05.2026:
- VLLAZNIA 63 18 9 9 42-27
- AF ELBASANI 62 17 11 8 48-37
- EGNATIA 57 16 9 11 42-34
- DINAMO 49 12 13 11 43-33
- PARTIZANI 48 13 9 14 38-48
- SK TIRANA 44 11 11 14 36-46
- FK VORA 42 10 12 14 39-40
- TEUTA 42 9 15 12 32-37
- BYLIS 41 10 11 15 38-50
- 10.FLAMURTARI 36 8 12 16 39-45
Lind pyetja: a do të protestojnë e demostrojnë drejtuesit e klubeve të futbollit, pse jo dhe qindramijërat e dashamirëve shqiptarë të futbollit, për ta ndryshuar këte skemë dështuese që ka denatyruar vlerat e vërteta të Kampionatit Kombëtar të Futbollit të Shqipërisë?
Aq më tepër që po përjetojmë stinën e pandalshme të demostratave politiko-shoqërore-kundërqeveritare, çka Shqipëria nuk i kishte pa deri më sot. Edhe për shoqërinë tonë kombëtare të futbollit, shembulli qenka te dera e shtëpisë…
Kështu pra, Belgjika e flaku tej “play – off-in” shkatërrues, teksa priten demostrata kundërshtuese edhe në Shqipëri! Them se e meritoi këtë titull ky shkrim.
