Luiza Gega është sot Kampione e Europës në fuqi në garën e 3000 metrave me pengesa. Luiza Gega është sot rekordmene në fuqi e Kampionatit Europian. Dhe këtë e arriti në Mynih të Gjermanisë, në një vend, në një qytet dhe në një stadium historik. Është ndër triumfet më të mëdhenj të historisë modeste të sportit shqiptar. Në mos më i madhi. Ajo arriti në majën e Europës me pasion, me punë të madhe, me këmbëngulje dhe me sakrifica të paimagjinueshme. Pas kthimit nga Holanda me medaljen e argjendë, mori një dhuratë shumë të çmuar, prishjen e pistës së vetme të vrapimit në kryeqytet, stadiumin “Qemal Stafa”. Shkoi në Elbasan për t’u stërvitur.
Përballoi stresin e rrugës vajtje-ardhje. Nga mungesa e një piste tartani në Tiranë, u stërvit edhe te Shkolla e Bashkuar. Në një terren me gurë. Po po, e lexuat mirë: Në një terren me gurë. Si pasojë, nxorri dy herë kavilen… Për të arritur në majë të Europës, Luiza është rrëzuar shumë herë, por ka ditur të ngrihet dhe të ecë përpara. Dhe të vendosë sot emrin e Shqipërisë në majën e mbretëreshës së sporteve. Është kampione e Europës në një vend që nuk ka piste olimpike! Skandal! Luiza nuk ka garuar vetëm me kundërshtaret e saj, ajo për vite të tëra ka garuar me pengesat e mëdha jashtë piste. Shqipëria sot ka nevojë për shumë e shumë Luiza.
Ndaj unë e quaj me të drejtë: Shën Luiza. Ajo është një model perfekt për rininë e sotme dhe për rininë e së ardhmes: Sportiste e shkëlqyer, kampione e modestisë, qytetare dinjitoze! E dinim të gjithë që triumfi historik i Luizës do përdorej politikisht. Kushdo të ishte në pushtet të njëjtën gjë do të bënte, kjo nuk diskutohet. Por privatizime të tilla janë të papranueshme. Hipokrizi e gjallw!
Luiza është e të gjithëve, jo e qeverisë. E morët me kadillak (nuk e mora vesh ç’punë kishte ministrja e sportit në atë makinë???) dhe e futët me vrap brenda. Duke lënë njerëzit që kishin dalë ta presin në diellin përvëlues. Duke ndjekur në dy monitorë ceremoninë tuaj private. E pse mos bëhej në sheshin Skënderbej ajo ceremoni??? Luiza është e të gjithëve, dhe ju jeni të fundit…
Pse privatizoni gjithçka dreqi e mori??? A bëri mirë Luiza që pranoi atë ceremoni? Atë e di ajo. Askush nga ne nuk kemi të drejtë ta gjykojmë… Por, një gjë e dimë pothuajse të gjithë: Nuk i detyrohet asgjë, askujt! Përveç trajnerit të saj fantastik Taulant Stërmasi!
