Shkruar nga Endri ÇINARI
Patrik Bardhi është një nga futbollistët që ka marrë një detyrë të re në Vllazninë e drejtuar nga trajneri hungarez Caba Laszlo. Në fitoren minimale 1-0 ndaj Dinamos, tekniku kuqeblu vendosi t’i besonte 28-vjeçarit një pozicion të ndryshëm nga ai me të cilin ishte mësuar të luante, duke e aktivizuar si mbrojtës të djathtë.
Ish-futbollisti i Vorës u pa kështu në një rol që nuk ishte ndër më të zakonshmit për të gjatë karrierës së tij. Bardhi është dalluar kryesisht për kontributin në krahun e djathtë në fazën sulmuese, por këtë herë iu desh të përmbushte edhe detyrat mbrojtëse, në një ndeshje ku Vllaznia kishte nevojë për stabilitet dhe siguri në prapavijë.
Megjithatë, 28-vjeçari e përballoi me sukses këtë provë, duke dhënë një paraqitje në lartësinë e duhur. Përveç përgjegjësive në mbrojtje, Bardhi nuk hoqi dorë as nga tiparet e tij karakteristike, me shpërthimet në krahun e djathtë dhe tentativat për t’u bashkuar me aksionet sulmuese të shkodranëve.
Në një takim ku rezultati kishte rëndësi të veçantë për kuqeblutë, paraqitja e Bardhit ishte një sinjal pozitiv edhe për stafin teknik. Fitorja ndaj Dinamos i dha Vllaznisë tri pikët e para të sezonit, por njëkohësisht i ofroi Laszlos mundësinë për të eksperimentuar me alternativa të reja në formacion.
Në këtë mënyrë, trajneri hungarez duket se ka zbuluar një tjetër zgjidhje për krahun e djathtë, duke shfrytëzuar shpejtësinë dhe energjinë e një lojtari që mund të japë kontribut në të dyja fazat e lojës. Një përshtatje që, të paktën në provën e parë, rezultoi bindëse.
Mbetet për t’u parë nëse Laszlo do t’i besojë sërish fanellën e titullarit numrit 14 të Vllaznisë në këtë pozicion, apo nëse aktivizimi i tij si mbrojtës i djathtë ishte një zgjidhje e diktuar nga rrethanat e ndeshjes. Për momentin, Patrik Bardhi ka fituar një tjetër rol për të qenë i dobishëm në skemat e trajnerit hungarez.
Burimi: Gazeta “Shkodra Sport”
