Dy futbollistë të Vllaznisë, pikërisht mbrojtësi Melos Bajrami dhe mesfushori Ardit Krymi janë zgjedhur në formacionin më të mirë të javës së 7-të të “Abissnet Superiore” nga Federata Shqiptare e Futbollit.
Kjo e fundit ka publikuar pak minuta më parë 11-shen më të mirë të javës, të dalë nga mendimet e trajnerëve të ekipeve kombëtare të moshave dhe pjesë e saj janë vlerësuar edhe dy futbollistët e Vllaznisë që janë vlerësuar për paraqitjen e tyre të mirë në ndeshjen ndaj Bylis të fituar me rezultatin 1-0.
Të tjerët janë Aldo Teqja i Dinamo City-t i cili mbajti të paprekur portën në ndeshjen kundër Egnatias. Mbrojtja përpos Bajramit përbëhet edhe nga Edison Ndreca (Egnatia), Saliou Sembene (Partizani) dhe Rimal Haxhiu (Tirana).
Irgi Kasalla i Vorës dhe Xhoele Maçolli i Teutës përbëjnë krahët e mesfushës dhe në qendër qëndron futbollisti i Vllaznisë, Ardit Krymi.
Në sulm rreshtohen tre futbollistët: Bernard Karrica (Vora), Vusal Isgandarli (Partizani), Ibrahima Diallo (AF Elbasani).
Trajneri më i mirë i javës së 7-të është përzgjedhur Arjan Bellai i Vorës, pas fitores 1-2 në transfertë kundër Elbasanit.
