Vllaznia ka hyrë në një fazë riorganizimi totale. Stafi teknik ka filluar të bëjë planet për të ndërtuar skuadrën e sezonit të ardhshëm dhe pjestarët e tij janë çdo ditë me lista në duar. Duket se mund të jenë rreth 10 lojtarë nga ata që e mbyllën sezonin e kaluar të cilët nuk do jenë më pjesë e skuadrës.
Pas Andrey Yago, Alexandros Kouros, Elmando Gjinit, Kevin Dodajt dhe Charles Bismark, një tjetër futbollist duket i sigurtë në largim. Bëhet fjalë për mbrojtësin e majtë Esin Hakaj.
Futbollisti shkodran ka qenë i pafat në sezonin e fundit teksa për një periudhë të gjatë është shoqëruar nga dëmtime të njëpasnjëshme dhe si rrjedhojë ka munguar në jo pak ndeshje duke mos arritur dot të japë kontributin e tij për skuadrën.
Hakajt i ka mbaruar kontrata me Vllazninë dhe duket e sigurtë që palët nuk do të ulen në tavolinë për të biseduar për zgjatjen e saj. Tashmë mbetet për t’u parë se cili do të jetë destinacioni i ardhshëm i 29 vjeçarit.
Burimi: Gazeta “SHKODRA SPORT”
