Shkruar nga Maringlen ZHIVANI
Trajneri Dritan Smajli ka nisur zyrtarisht punën në krye të Ilirisë për sezonin e ri 2026-27, pasi është rikthyer në pankinën e skuadrës nga Fushë-Kruja me synimin për ta bërë ekipin edhe më konkurrues në Kategorinë e Parë. Rikthimi i tij vjen pas një sezoni pozitiv të Ilirisë, e cila arriti deri në fazën “Play-Off” dhe ishte shumë pranë ngjitjes në elitën e futbollit shqiptar.
Smajli do të punojë së bashku me ndihmësin Elidon Topi për ndërtimin e skuadrës, duke synuar ruajtjen e boshtit të sezonit të kaluar dhe përforcimin e organikës me afrime cilësore.
Objektivi i stafit teknik është krijimi i një ekipi që të rivalizojë sërish për vendet e para dhe të luftojë për promovimin në Superiore. Në nisje të fazës përgatitore, trajneri lezhjan theksoi se bashkëpunimi me presidencën do të jetë çelësi për realizimin e objektivave të klubit.
Seanca e parë stërvitore u zhvillua në stadiumin “Redi Maloku”, me pjesëmarrjen e pjesës më të madhe të futbollistëve, ndërsa puna për kompletimin e skuadrës do të vijojë edhe gjatë merkatos.
Burimi: Gazeta “SHKODRA SPORT”
