BOKS

Dy boksierët shkodranë Kristian Shytani dhe Arjon Kajoshi kanë marrë medalje të arta në turneun ndërkombëtar të Bosnjës të zhvilluar këtë fundjavë në Sarajevë. Ata kanë arritur të sfidojnë kundërshtarët e tyre në ndeshjet finale të zhvilluara mesditën e sotme duke bërë që flamuri shqiptar të ngrihet lart edhe në këtë aktivitet ku merrnin pjesë boksierë nga 10 shtete të Europës. Turneu i cili është i përvitshë, sivjet ishte edicioni i 13-të i tij, mban emrin e gjeneralit Mustafa Hajrulahoviç dhe nga viti në vit po merr përmasa edhe më të mëdha. Në edicionin e sivjetëm Shqipëria u përfaqësua me tre boksierë, ku përveç dy shkodranëve Shytani e Kajoshi ishte edhe tiranasi Anxhelo Merkohasanaj por ai është mundur në gjysmëfinale nga një boksier kroat.

Një nga emrat e nderuar të boksit shkodran dhe atij shqiptar është edhe Ramiz Rraboshta. Karriera e tij sportive është e gjatë fillimisht si sportist dhe më pas për vite me rradhë si gjyqtar i këtij sporti. Ai ka lindur në vitin 1936 ndërkohë që ka qenë viti 1953 kur Ramizi do të niste karrierën e tij në këtë sport shumë burrëror dhe rreshtohet tek ekipi i Vllaznisë. Në vitin 1954 do të konkurronte në garat e para me të rinjtë ndërsa në fund të po këtij viti do të kalonte me ekipin e të rriturve dhe për të vazhduar me të deri në vitin 1962 kur për një dëmtim në dorë u detyrua të lërë sportin e tij të dashur- boksin. Gjatë këtyre 8 viteve, ka dalë dy herë kampion me të rinjtë dhe disa herë nënkampion me të rriturit. Si suksesi më i madh në karrierën e tij veçohet fitimi i Kupës së Republikës dhe marrja e kupës si boksieri më i mirë i këtij aktiviteti në vitin 1955. Pa lënë mënjanë këtu pastaj edhe ndeshjen e madhe që ka mbetur ende edhe sot e kësaj dite në mendjen e tij dhe të gjithëve, ndeshja ndaj Pandi Dimos së Durrësit.

Dy boksierët e ekipit të Vllaznisë, Kristian Shytani dhe Arjon Kajoshi, të shoqëruar edhe nga trajneri Jozef Sermi, dhe bashkë me ta edhe tiranasi Merkohasanaj, sot janë nisur drejt Bosnjës për të marrë pjesë në një turne ndërkombëtar dyditor që zhvillohet në Sarajevë. Në këtë turne përveç këtyre dy boksierëve tanë marrin pjesë edhe sportistë nga Gjermania, Turqia, Sllovenia, Kroacia, Serbia, Maqedonia, Mali i Zi, Kosova dhe Bosnja.

Mund të duket e çuditshme por është e vërtetë. Ekipi i boksit të Tiranës përgatitjet për kampionatin kombëtar që do të zhvillohet muajin e ardhshëm në Shkodër, ka zgjedhur t'i bëjë pikërisht në këtë qytet. Nuk dihet arsyeja pse trajneri Bushati ka vepruar kështu, ndoshta për t'iu përshtatur ambjentit apo dhe ndonjë arsye tjetër por e vërteta është se ekipi kryeqytetas ka zgjedhur pikën turistike të Shirokës për t'u përgatitur.

Kampionati kombëtar i boksit për këtë vit do të zhvillohet në Shkodër. Kështu ka vendosur kryesia e kësaj Federate në mbledhjen e saj të ditëve të fundit, pasi më parë është mbledhur edhe këshilli i trajnerëve dhe ka vendosur në këtë mënyrë. Madje përveç kampionatit të të rriturve, në Shkodër do të zhvillohet edhe kampionati i 18 vjeçarëve. Natyrisht që një vendim i tillë është i favorshëm për sportdashësit shkodranë të cilët do të kenë mundësinë të shohin në ringun e pallatit të sportit “Qazim Dervishi” boksierët më të mirë të vendit. Ndërkohë, Kupa e Shqipërisë është rënë dakord që të zhvillohet në Vlorë por nuk ka datë të përcaktuar ngaqë ka një dilemë për ta zhvilluar në nëntor apo dhjetor.

Pas Kristian Demajt edhe dy boksierët e tjerë të kombëtares shqiptare- Asmer Bilali e Albi Sorra, e kanë nisur me fitore pjesmarrjen e tyre në Kampionatin Europian që është duke u zhvilluar në Sofje të Bullgarisë. Takimi i parë ka qenë ai i boksierit shkodran i cili në ndeshjen e zhvilluar pasditen e sotme, ai ka patur përballë boksierin çek Tomas Bezvoda. Ndeshja është shoqëruar me rivalitet të madh por në fund ka triumfuar boksieri kuqezi me rezultatin 2-1. Ai ka arritur të marrë fitoren nga vlerësimi i gjyqtarit azerbajxhanas që ka dhënë rezultatin 29-28 si dhe të atij nga Kazakistani që ka dhënë të njëjtin vlerësim.

Boksieri shkodran Kristian Demaj ka startuar për mrekulli në kampionatin evropian që po zhvillohet në Sofje të Bullgarisë. Në ndeshjen e mbrëmjes së somte ai shkëlqyer me fitore ndaj boksierit nga Bosnja e Hercegovina, Elvir Sendro. Demaj ishte më i mirë në tre raundet duke triumfuar tre me zero. Ndeshja është dominuar nga boksieri shkodran i cili ka dominuar duke fituar këtë ndeshje ndërkohë që sipas shortit të hedhur, në turin tjetër do të ndeshet me një boksier polak i cili është kampion Europe në fuqi megjithatë boksieri i kombëtares shqiptare do të tentojë fitoren edhe ndaj tij.

Katër boksierë të ekipit kombëtar shqiptar që nga dita e sotme janë grumbulluar në pikën turistike të Razmës në përgatitje për Kampionatin Europian që do të zhvillohet në datat 7-15 gusht në Sofje të Bullgarisë. Boksierët e grumbulluar janë Krenar Zeneli, Denis Nurja, Asmer Bilali dhe Kristian Demaj, ndërkohë që bashkë me ta do të jenë edhe trajnerët Zef Gjoni dhe Jozef Sermi. Ky grumbullim është bërë i mundur falë sponsorizimit të dy presidentëve të ekipit të Vllaznisë, Flamur Hoxha dhe Gjergj Livadhi. Sipas trajnerit Gjoni, përgatitjet janë disi të vonuara megjithatë do të bëhet maksimumi për të bërë një paraqitje të mirë në këtë aktivitet të rëndësishëm.

Kanë mbetur vetëm 9 ditë nga dita kur do të zhvillohet Asambleja Zgjedhore e Federatës Shqiptare të Boksit dhe atmosfera tashmë ka filluar të nxehet. Siç dihet, "lufta" ekziston në mes dy grupeve dhe prej kohësh, kanë filluar edhe përplasjet. Nga njëra anë, është presidenti aktual i Federatës Gjergj Leqejza dhe pjestarë të tjerë të këtij institucioni ndërsa në krahun tjetër janë shumica e ekipeve të vendit të cilët tashmë kanë propozuar për president një emër tjetër, atë të Florend Kalivopulit. Ky i fundit është propozuar nga 11 klube dhe shoqata sportive ndërsa presidenti aktual Leqejza është propozuar nga vetëm 4 klube e shoqata.

Dy boksierë të Vllaznisë kanë triumfuar në kampionatin kombëtar të 14 vjeçarëve duke zënë vende të para dhe duke u shpallur kampionë në peshat respektive. Leonard Ara dhe Armen Arrazi, kanë triumfuar mbi kundërshtarët e tyre, në kampionatin e zhvilluar për dy ditë me rradhë në qytetin e Vlorës. Madje Ara ka marrë edhe kupën e boksierit më luftarak në këtë kampionat. Ekipi i Vllaznise ka marre pjese vetem me keto dy boksiere ne kete kampionat dhe te dy ata kane rezultuar te suksesshem duke dominuar mbi rivalet e tyre. Drejtuesit e boksit shkodran I konsiderojnë këto dy sportistë si element të së ardhmes dhe kanë shumë besim tek perspektiva e tyre.