FUTBOLL - KATEGORIA E PARE

Shumë prej futbollistëve shkodranë janë në merkato ditët e fundit. Kështu, dikush prej tyre kërkon Superligën, të tjerë kategorinë e parë apo dhe më tutje. E rëndësishme për ta është të gjejnë "një strehë" ku të luajnë futboll dhe të sigurojnë disa të ardhura financiare. Kështu mesfushori Erjon Hoti pasi ka luajtur me Dinamon në fazën e parë të kampionatit, tashmë është shumë pranë arritjes së një marëveshje me Pogradecin. Drejtuesit e tij e kanë pëlqyer dhe ka mbetur vetëm mbyllja e anës financiare të kontratës. Po ashtu, në Superligë kërkon të luajë edhe sulmuesi 20 vjeçar Edison Puka.

Ish-futbollisti i Vllaznisë Albert Kaçi i ka dhënë fund aventurës së tij të shkurtër tek skuadra e Adës dhe tashmë është vënë në kërkim të një skuadre tjetër. Ditën e djeshme ai ka qenë në Lezhë, madje ka dalë edhe në stërvitje me ekipin e Besëlidhjes dhe me shumë mundësi do jetë pjesë e kësaj skuadre për fazën e dytë të kampionatit. Mesfushori 30 vjeçar është shumë pranë arritjes së një marrëveshjeje me presidentin Noka.

Ada pas një serie rezultatesh negative, më në fund është kthyer në fitore në shtëpinë  e vet teksa dje pasdite ka mundur Butrintin e Sarandës. Djemtë e teknikut Nikaj kanë arritur të fitojnë me shifrat 2-0 në një përballje pa shumë rivalitet. Përballë njëra tjetrit ka qenë një ekip si Ada që kërkonte fitoren dhe  një tjetër  si Butrinti që dukej se kishte udhëtuar për të marrë jo më shumë se një barazim në këtë përballje.

Në ndeshjen e javës së 14-të të kategorisë së parë, ekipi i Adës është mundur në shifrat 3-0 në ndeshjen që ka luajtur në stadiumin e Lushnjës ndaj skuadrës vendase. Pritej njëfarë reagimi i skuadrës velipojake e cila pas humbjes javën e kaluar në Velipojë me Luftëtarin, rregjistron edhe një tjetër disfatë duke bërë kështu që pozitat e saj në renditje të bien dhe tashmë renditet në vendin e nëntë në renditje.

Një Sukaj është fare pranë kalimit tek skuadra e Adës. Por nuk bëhet fjalë për sulmuesin e Vllaznisë Xhevahir Sukaj sepse do ishte absurde që një lojtar i përmasave të tilla, të luante në kategorinë inferiore të futbollit shkodran. Bëhet fjalë për të vëllanë, portierin e ri Suadin. Ai është aktualisht pjesë e ekipit të të rinjve të Vllaznisë por pa gjetur shumë hapësirë edhe për shkak të moshës së tij sepse është vetëm 17 vjeç.

Humbja e sotme ndaj Luftëtarit nuk do kalojë pa pasoja në kampin velipojak. Drejtuesit e klubit janë mbledhur në orët e vona të mbrëmjes dhe kanë analizuar paraqitjen e dobët të disa prej futbollistëve të tyre. Në këto kushte, ata kanë vendosur që të përjashtojnë portierin Olti Bishani për mosimpenjimin e duhur në këtë ndeshje shumë të rëndësishme. Njëkohësisht, drejtuesit e klubit kanë paralajmëruar se do ketë masa ndëshkimore financiare edhe për disa futbollistë të tjerë të këtij ekipi.

Ekipi i Adës nuk ka mundur të marrë qoftë edhe një pikë në ndeshjen e sotme të luajtur në Velipojë. Ajo është mundur nga skuadra kryesuese e kampionatit- Luftëtari i Gjirokastrës në shifrat 1-2. Goli i vetëm i Pukës në pjesën e dytë të ndeshjes, nuk i ka mjaftuar velipojakëve të marrin të paktën një barazim sepse miqtë kanë luajtur më mirë. Kanë shënuar shpejt dy gola që në pjesën e parë, e kanë kontrolluar lojën dhe nga kjo Ada e ka patur të vështirë.

E shtuna e kësaj jave do dhurojë një sfidë shumë interesante për kampionatin e kategorisë së parë. Në Velipojë vjen për të luajtur me Adën vendase ekipi kryesues i këtij kampionati pikërisht Luftëtari i Gjirokastrës. Kjo ndeshje konsiderohet shumë e rëndësishme për ekipin velipojak sepse në bazë të rezultatit të saj do përcaktohet edhe e ardhmja e saj në renditje. Në rast fitoreje, Ada do rreshtohet në 5-6 ekipet më të mira të kampionatit por në rast të ndonjë rezultati tjetër, pretendimet e kësaj skuadre zbehen disi.

Dy futbollistë shkodranë pikërisht Bledar Perfati dhe Jaser Rrustja, pas aventurës 6 mujore në Kosovë me ekipin e Trepçes, janë kthyer në qytetin e tyre dhe janë shumë pranë kalimit tek skuadra e Adës. Këta dy futbollistë njihen për vlerat e tyre dhe nëse do bëhej realitet kalimi tek velipojakët, do ta rriste shumë forcën e kësaj skuadre për fazën e dytë të kampionatit.

Drejtuesit e Adës së Velipojës mendojnë se deri tani kanë bërë një sezon të mbarë dhe se skuadra gjëndet brenda objektivave të fillim sezonit. Ai që flet për ecurinë e deritanishme të Adës është sulmuesi Etrit Nika që njëkohësisht mban edhe rolin e zëvendëstrajnerit tek Ada. Sipas tij ekipi bregdetar deri tani ka bërë futbollin më të pastër në Kategorinë e Parë.