FUTBOLLI I FEMRAVE

Vllaznia në futboll për femra është për rekorde. Ecuria e saj vetëm me fitore, gola të shumtë të shënuar dhe asnjë i pësuar, e bëjnë atë të ndihet krenar për skuadrën që drejton. Bëhet fjalë për Nikolin Lekën, trajnerin që drejton këtë ekip të shpallur pak ditë më parë "kampion i dimrit" në futbollin e femrave. "Vërtetë ndihem mirë që stërvis dhe drejtoj këtë ekip të pakonkurrueshëm. Dikush thotë se "kemi vrarë garën" por në fakt nuk është faji i Vllaznisë.

Me ndeshjet e sotme, të vlefshme për javën e nëntë, është mbyllur faza e parë e kampionatit kombëtar të futbollit të femrave. Në përfundim ë këtyre ndeshjeve, Vllaznia kampione në fuqi padyshim që ka spikatur sërish dhe jo vetëm që është shpallur "kampione dimri" por duket shumë e sigurtë drejt shpalljes kampione e vendit për të katërtën herë rradhazi. Kjo ngaqë diferenca aktuale me ekipin e vendit të dytë që mbahet nga Apolonia, është 5 pikë. Në ndeshjet e sotme, vajzat kampione kanë arritur një fitore shumë të thellë, 20-0 ndaj ekipit tjetër të Shkodrës- The Door. Protagonistet kryesore të këtij suksesi kanë qenë dy sulmueset, Uendi Muja dhe Megi Doçi që sëbashku kanë shënuar 19 gola!!! Muja ka qenë autore e 12 golave ndërsa Doçi e ka dërguar topin në rrjetën kundërshtare 7 herë.

Futbollistet e Vllaznisë nuk kanë të ndalur në rrugën e tyre drejt titullit të katërt kampion rradhazi.Ato kanë fituar sot ndeshjen e tyre të tetë në po kaq ndeshje të luajtura. Përballë tyre këtë herë ka qenë Teuta e Durrësit dhe në fund të takimit është fiksuar rezultati 12-0. Një fitore e thellë, por nga rastet e krijuara, mund të kishte qenë edhe më e thellë. Gjysmën e këtyre golave të shënuar e ka realizuar sulmuesja Uendi Muja. Pesë të tjerë janë shënuar nga e njohura Megi Doçi ndërsa golin e fundit e ka realizuar Ambra Gjergji.

Kampionet në fuqi të Shqipërisë në futbollin e femrave, vajzat e Vllaznisë, kanë arritur një tjetër fitore në kampionat. Ato mesditën e sotme kanë fituar 2-0 ndaj Apolonisë, skuadër e cila mbante vendin e dytë në renditje. Ndeshja është zgjidhur që në pjesën e parë. Dy golat e shënuar kanë patur për autore sulmuesen Uendi Muja dhe mbrojtësen Arbiona Bajraktari. Në pjesën e dytë, trajneri Leka u ka dhënë mundësinë edhe futbollisteve të stolit të luajnë dhe për këtë arsye, niveli ka rënë disi duke bërë që të mos ketë më gola.

Zhurma e krijuar kohët e fundit në lidhje me zgjedhjet e bëra nga shumë futbollistë të cilët kanë vendosur të lënë ekipet kombëtare të Shqipërisë dhe të zgjedhin ato të Kosovës, natyrisht që pritet të vazhdojë edhe për disa kohë të tjera. Edhe tek futbolli i femrave ka ndodhur një gjë e tillë, madje shumë vajza kanë braktisur kombëtaren U-19 vetëm pak ditë parë një ndeshje eliminatore duke e vënë në një pozitë shumë të vështirë trajnerin Dede.

Kampionet e Shqipërisë në futboll për femra nuk ndalen në rrugën e tyre drejt titullit të katërt kampion rradhazi. Vajzat e Vllaznisë kanë mundur sot një tjetër rival, Tiranën AS me rezultatin 5-0. Ndeshja e vlefshme për javën e gjashtë të kampionatit është luajtur në fushën "Reshit Rusi" dhe ndonëse miket nga kryeqyteti janë mundur të bëjnë maksimumin e tyre, e kanë patur të vështirë ndaj vendaseve. Megi Doçi ka shënuar edhe dy gola të tjerë në këtë takim, ndërkohë që po kaq gola ka shënuar edhe Suada Jashari ndërsa golin tjetër e ka shënuar Uendi Muja.

Pavarësisht se ka fituar me rezultatin e thellë 7-0 ndaj Juban Danjes, drejtuesit e Vllaznisë në futboll për femra nuk janë të kënaqur me lojën e zhvilluar ng futbollistet e këtij ekipi. Sipas tyre, kjo është normale sepse objektivat  e Vllaznisë janë krejt tjetër gjë dhe nuk kanë të bëjnë aspak me fitimin e titullit kampion në Shqipëri. Pjesa e parë e ndeshjes është mbyllur me rezultatin 2-0, me dy gola të shënuar nga sulmuesja Muja. Në pjesën e dytë ndërkohë janë shënuar edhe pesë gola të tjerë, që kanë patur për autore, mbrojtësen Gjini në tre raste, ndërsa dy të tjerët janë shënuar nga Doçi dhe Muja.

Kampionati kombëtar i futbollit të femrave tashmë ka hyrë në rrjedhën e tij teksa janë zhvilluar katër javë dhe Vllaznia kampione në fuqi, e ka nisur e tillë edhe kampionatin aktual.Ajo i ka fituar të katër ndeshjet e deritanishme por të njëjtën ecuri ka edhe Apolonia dhe të dy ekipet kryesojnë renditjen me pikë të plota. Arben Parmeza, trajneri i një tjetër ekipi, pikërisht i "Albanian Ajax School", thotë se ky rivalitet është vetëm momental.

Duhej të ishte një sfidë ndryshe por ka rezultuar tjetër gjë. Ndeshja kryesore e kampionatit kombëtar të futbollit të femrave, ajo në mes Vllaznisë dhe Kinostudios, është dominuar totalisht nga vajzat shkodrane që kanë fituar me rezultatin e thellë 5-0, duke treguar edhe njëherë tjetër se nuk do kenë rivale as në këtë kampionat. Në pjesën e parë ka shënuar dy herë Megi Doçi ndërsa në fillimin e pjesës së dytë, golin e tretë për Vllazninë e ka shënuar sulmuesja Ambra Gjergji. Në minutat e tjera, do të ishte sërish Doçi që do të shënonte edhe dy gola të tjera nga pika e bardhë e 11-metërshit dhe përfundimisht 5-0  për skuadrën shkodrane që hedh kështu një hap të sigurtë drejt titullit të katërt kampion rradhazi.

Kampionati kombëtar i futbollit të femrave ndryshe nga vitet e kaluara ku Vllaznia ishte skuadra lider absolute dhe gjithnjë ekipi për t’u mundur, këtë viti pritet që ky kampionat të ketë më shumë rivalitet. Edhe vitet e kaluara është menduar që të ndërtohen ekipe për tërivalizuar Vllazninë por nuk ia kanë arritur qëllimit. Kësaj here një gjë të tillë do ta provojë skuadra e Kinostudios, ekip që ka në përbërje disa sportiste kosovare por ka mbledhur futbolliste edhe nga ekipe të tjera për të ndalur vajzat kuqeblu. Kështu me ekipin e Kinostudios nga Vllaznia i janë bashkuar Erida Bajrakurtaj, Greta Lazri dhe Desantila Hoxha përpos edhe lojtareve të tjera.