SHKODRANET NEPER BOTE

Një ndeshje mjaft interesante dhe njëkohësisht shumë domethënëse është organizuar ditën e djeshme në Gjermani. Një ndeshje në kujtim të ish- futbollistit të Vllaznisë dhe të kombëtares shqiptare Zamir Shpuza, i ndarë nga jeta disa muaj më parë në mënyrë krejt të papritur. Ajo është zhvilluar në Dudenhofen dhe në të kanë marrë pjesë kolegë të Zamirit, shqiptarë dhe të huaj. Bashkë me to kanë luajtur edhe dy djemtë e tij, Klinti dhe Kili, madje ato kanë qenë edhe autorë golash. Por më shumë sesa rezultati i kësaj miqësoreje, rëndësi ka kujtimi që i është bërë Tutos.

Një kryevepër e shkodranit Bekim Balaj i ka dhënë një fitore me shumë vlera Shqipërisë në ndeshjen e parë eliminatore ndaj Portugalisë në fushën e kësaj të fundit. Fitorja 1-0 e kuqezinjve mund të cilësohet surpriza e madhe e mbrëmjes së sotme. Balaj në minutat e para të pjesës së dytë, ka shfrytëzuar një kros të bukur të Roshit nga e djathta dhe fluturimthi e ka dërguar topin në rrjetë. Një gol që ka mjaftuar për Shqipërinë që ajo të dalë kryelarte nga Portugalia. Kjo e fundit ndërkohë është kontestuar gjatë nga tifozët e saj në fundin e ndeshjes teksa ata kanë valvitur shamitë e bardha në shenjë falimentimi të këtij ekipi që në fakt sonte luajti pa yllin e saj- Ronaldon.

Tjetër gol dhe spektakël i një shkodrani. Tre gola në tri ndeshje, Hamdi Salihi nuk ndalet në Izrael. Sulmuesi shkodran dje ka arritur të shënojë sërish për Hapoel Ironi Akre, por këtë herë goli i tij ka mrekulluar izraelitët. Në ndeshjen kundër Makabi Haifa në shtëpi, në një stadium të tejmbushur, Salihi ka realizuar një supergol me roveshatë, ashtu siç di t’i bëjë vetëm ai. Në minutën e 38-të, pas një krosimi nga krahu i djathtë, sulmuesi shfaqet i lirë brenda zone dhe me një veprim të shkëlqyer akrobatik e dërgon topin në trekëndësh. Megjithatë, ky gol nuk mjaftoi që skuadra e shqiptarit të fitonte, pasi Makabi barazoi afër fundit dhe ndeshja u mbyll 1-1.

Sulmuesi shkodran Bekim Balaj ka shënuar sot për skuadrën e tij Jagiellonia në ndeshjen e vlefshme për javën e 23-të të kampionatit polak të futbollit. Ai ka qenë autor i golit të barazimit të përkohshëm në ndeshjen që Jagiellonia ka luajtur në fushën e vet me Podbeskidzie. Ka qenë kjo e fundit që ka kaluar e para në avantazh të Malinovskit në minutën e 6-të dhe Balaj do të barazonte shifrat në minutën e 24-të. Pas këtij goli do ishte sërish Jagiellonia që do shënonte dhe do kalonte në avantazh me anë të Dani Quintana në '55 por dalja me karton të kuq e Popkhadze 12 minuta më vonë do t'i jepte mundësi kundërshtarit që të barazonte shifrat pikërisht në minutën e 94-të.

Sulmuesi shkodran Hamdi Salihi e ka nisur mbarë aventurën e tij në kampionatin izraelit të futbollit me skuadrën e tij Hapoel Acre. Ajo ka fituar sot në fushën e saj ndaj një kundërshtari shumë të fortë me rezultatin 4-3. Në fakt ka qenë skuadra udhëtuese ajo që ka qenë në udhëheqje të rezultatit 3-1 kur Salihi është futur në fushë. Pikërisht ai do shndërrohej në protagonist sepse brenda 10 minutash do shënonte dy gola duke barazuar shifrat.

Skuadra e Adës ka bërë maksimumin e mundshëm në merkaton e dimrit për të ofruar lojtarë cilësorë në mënyrë që të shpëtojë nga rënia prej kategorisë. Ajo ka ofruar dy futbollistë malazezë si dhe Pukën dhe Markolajn. Por ndërsa janë ofruar disa futbollistë, planet për drejtuesit e Adës janë prishur jo pak. Tre nga futbollistët e saj më të mirë, mbrojtësit Feliks Tota e Oltion Drabeja si dhe sulmuesi Ndue Mujeci. Të tre këta futbollistë kanë marrë një ofertë më të mirë nga ekipi kosovar I Trepçes së Mitrovicës. Për rrjedhojë, prej dy ditësh këta futbollistë ndodhen në Kosovë dhe madje ditën e djeshme kanë firmosur kontratë me këtë ekip për të qenë pjesë e tij deri në fund të sezonit.

Zbulohet destinacioni i ri i mundshëm i Hamdi Salihit për pjesën e dytë të sezonit. Sulmuesi shkodran, sikurse është raportuar javët e fundit, pritet ta vijojë karrierën në Europë, pikërisht në kampionatin francez tek skuadra e Nantes. Lajmi konfirmohet nga prestigjiozja franceze L’equipe, që u referohet levizjeve më të fundit te skuadra që renditet në vendin e 6 në Ligën e parë. Drejtuesit e Nantes kanë vendosur t’i besojnë sulmuesit shqiptar, i cili nga e marta duhet të bindë trajnerin Michel Der Zakarian, para se të hedhë të zezën mbi të bardhë. Sulmuesi i kombëtares shqiptare konsiderohet alternativa më e mirë për zëvendësimin e Filip Djorxhevic, i cili pritet të largohet në fund të sezonit nga kjo skuadër.

Mundësi shkodran Elis Guri rikthehet sërish në nivele të larta. Në garat e djeshme të vlefshme për kampionatin bullgar, 30 vjeçari ka zënë vendin e parë duke sfiduar të gjithë kundërshtarët e tij dhe duke u shpallur sërish kampion i këtij vendi ne peshen e tij, ate 96 kg. Në fakt për Elisin kjo nuk është hera e parë që triumfon në këtë vend por ky titull kampion ka patur një të veçantë sepse Guri rikthehej në tapet pas një mungese të gjatë si rrjedhojë e dëmtimit dhe më pas operacionit të kryer në shpatull. Titulli kampion i fituar dje natyrisht që do jetë një shtysë tashmë për të marrë rezultate të larta edhe në arenën ndërkombëtare, që në aktivitetin më të afërt që do të zhvillohet.

Armando Vajushi do të luajë për klubin italian të Udinezes, duke filluar nga janari i vitit 2014. Kjo behet e kryer ne shtetin ku ai po luan aktualisht. Dje mediat bullgare kanë zbuluar se presidenti i Liteksit, Grisha Gançev, ka arritur një marrëveshje me homologun e tij italian, Xhiampaolo Poco. “Gançev ka biseduar së fundmi me drejtuesit e Udinezes dhe futbollisti shqiptar pritet t’i bashkohet nga janari skuadrës friulane. Për shërbimet e tij Udineze do të paguajë 1.2 milionë euro te Liteksi, ndërsa paga e lojtarit ende nuk bëhet e ditur.