Marc Cucurella e nisi aventurën e tij te Real Madridi me një pritje aspak miqësore në “Veltins Arena”. Në debutimin e tij ndaj Schalkes, mbrojtësi spanjoll u vërshëllye nga tifozët vendas pothuajse në çdo prekje të topit.
28-vjeçari hyri në fushë në minutën e 61-të, duke zëvendësuar Álvaro Carreras. Pavarësisht atmosferës armiqësore, Cucurella po përjetonte një moment të veçantë, pasi realizoi ëndrrën për të luajtur me fanellën e Real Madridit. Por tifozët gjermanë kishin një arsye të fortë për reagimin e tyre.
Gjithçka lidhet me një episod të diskutueshëm nga çerekfinalja e Euro 2024 mes Spanjës dhe Gjermanisë. Në fundin e kohës së rregullt, një goditje e Jamal Musialës preku dorën e Cucurellas brenda zonës.
Arbitri Anthony Taylor nuk akordoi penallti, duke vlerësuar se krahu i spanjollit ishte në pozicion natyral pranë trupit. Spanja më pas fitoi ndeshjen 2-1 pas shtesave, duke eliminuar Gjermaninë nga turneu.
Vendimi shkaktoi debate të mëdha, ndërsa UEFA më vonë pranoi se Gjermanisë duhej t’i ishte dhënë një penallti. Duket se episodi ende nuk është harruar nga tifozët gjermanë, të cilët ia bënë të qartë Cucurellas qëndrimin e tyre. Megjithatë, vërshëllimat nuk ia prishën debutimin mbrojtësit spanjoll me Real Madridin.
“Jam shumë i lumtur. Pas gjithë kësaj qëndron shumë punë dhe i gjithë përkushtimi që kam dhënë ndër vite ia ka vlejtur”, u shpreh Cucurella pas ndeshjes.
