Dinamo humbi 2-1 sfidën e kampionatit kundër Vllaznisë. Një disfatë që i lë durrsakët në krizë rezultatesh, ku renditja në kampionat lë pak shpresa për të mbijetuar në Superiore. Për mikrofonat e “Super Sport”, ka folur trajneri i tyre Bledar Devolli.
Çfarë duhet të bëjë më shumë Dinamo?
“Duhet të bëjmë atë që bëmë në pjesën e dytë. Kundër një ekipi që luan futbollin më të mirë, janë shumë të shpejtë. Ne e nisëm mirë lojën. Herën e parë që erdhën në portë, morën penallti, po ashtu si në golin e dytë. Krijuam rastet dhe jo çdo ekip e ka mbajtur Vllazninë në 16 metrat e tyre. Është dhe ana psikologjie dhe ne si staf drejtues do punojnë në këtë aspekt. Rezultatet e kundërshtarëve ndikojnë, do vazhdojmë të punojmë me kokën poshtë dhe entuziazëm.”
Sulmi me Çinedun
“E kishim përgatitur ndryshe ndeshjen. E kishim përgatitur me dy lojtarë të shpejte dhe Ibraimin si 9 false. Besoj se e kapëm Vllazninë disa herë, por goli i dytë na prishi planet. I provuam të gjitha. Kundërshtari është i fortë në fushën brenda. Janë ekip që ikin në formë vertikale, prandaj luajtëm me tre mesfushorë.”
Goli i dytë i Vllaznisë dhe penalltia?
“Kisha dy minuta që i flisja Prodanit tek rasti, por këto gjëra ndodhin. E nisëm mirë ndeshjen.”
Skënderbeu “finalja” e sezonit?
“Kemi ndryshuar për mirë, prodhojmë raste dhe nuk shthuremi. Kemi qenë në lojë deri në fund. Për mua janë 13 ndeshje finale dhe jo vetëm ndeshja e Korçës. Të jemi pak më të qetë dhe të dalim nga kjo situata sa më shpejt dhe të mos kemi kokën tek renditja por të shikojmë lart.”
